Yiila 76 - WEN GBAŊKA

¹ Juda tɛŋka a seba Wen kama. Wa yuenni a zuak ya a bo Izirali tɛŋka po.

² Wa viuku a bo ka Salem tɛŋka po, ate wa boka jigini a chim Zayon.

³ Wa boka jigini wa yik peinyaama a pɔriŋ, wa yik ba ŋanchɔgsintaŋa ale ba gebisaŋa ale kpaliŋsa kɔlimaŋa a kaasi basi.

⁴ Fi ka waai ale a nyaksi ase bolim la, fi ta nalim ate bu gaam gu tii ale zuak la.

⁵ Ba kɔlim suinum pagrik nyama ŋantaŋa, ate ba dua a goa ba kpeglimka goom. Tugurik tɔŋdɔma wanyi mɛ an baga wa nisa a zak ŋmai ya.

⁶ Jekob Wen yaa, fi toariŋka a basi kama ate wusuma ale ŋa torokoba a duak tɛŋ nna chim.

⁷ Ka fi nyiini ale magsi ayen ba a chali fu yɔgsum. Ka wana ale baga a zaani fi niŋa ase fi sui a nin puuri?

⁸ Fi bo ka buusa a nyini wenŋmazuk, ate yɔgsum a yik tɛŋka demma ate ba nye nna diki

⁹ diipo ate fi Wen a yiti zaani ayen fi bo buusa a vari baai meena ale a nam tɛŋka zuk a basi la.

¹⁰ Chekki, fi suipuurumu a ta ka pimpauk a jam a te fu, ate ku kasi baai ale vuuk nyini fi suipuurumu po la.

¹¹ Ni puulim ale Naawen ni Wenni abe ni nye ni ale weeni diila. Basi ate tɛŋ sii ale kala a moata ni la a ta tiirita a jam te Waai ale magsi ayen ba a chali wa yɔgsum la.

¹² Wala ale a nye ate baai ale a nya tɛŋsa zuk la a ta badek siŋ tɛŋ. Tɛŋka nalima a ta yɔgsum chala ale wa kama.