Yiila 74 - WEN GBAŊKA

¹ Wen yaa, ka boan nyiŋ ate fi a zɛri ti a basi taam wuu? Ka boan nyiŋ ate fi sui a kab ale pa ŋaai ale a dɛ fi wuuku la?

² Teeri nuru baai ate fi da dipodipo la, teeri buui dii ate fi da tuesi a soa ba la, bala ale Zayon Guuku demma, juijui ate fi jam a boro la.

³ Viriŋ fi naŋsa a nya yeeŋa ale chim guuta a doa taam wuu la. Kaasuŋ kude meena ate dachiaka ta jam fi yenni po la.

⁴ Fi dachaasaŋa a yaa bo ka fi yenni po juijui ate fi a jam tu ti la a kaari tugurik nakdeka kaarika la. Dula jigini ale ba za a chamsi badek a nya.

⁵ Ba nye badek ase ka nidoa baai ale saasi laasa ayen ba ga che tiisa a lɔnsi diila.

⁶ Ba pai ka laasa ale pengaasa a che yenni daataŋa a kabri.

⁷ Ba ju fi yenni a lɔnsi tɛŋ. Ba taŋ juijui ate fi boro ate ta wi fi Yuenni la.

⁸ Ba weeni ba suiniima po kama ayen, ti le kaasi ba kama a basi. Ba ju juijui meena ate nuruba jo a zuli Wen tɛŋka zuk la a basi kama.

⁹ Ti an ŋman nya wakinkagla tuima, biisiteerɔba an tali ya, ate ti waai be zɛ nya kude ale za ku beni a soa diila.

¹⁰ Wen yaa, dachiaka ale nye fu la ate ku a ga paari ka dimpo? Dachiaka ale biisi fu yuenni a kaasi kama taam wuu?

¹¹ Ka boan nyiŋ ate fi pai fi juga nisaŋa a geri ŋaaŋ a za nya? Teeri si a chub ba a lɔnsi ate ba kaasi.

¹² Alege Fi Wen yaa, a nyini dipodipo ka fi ale m naab. Fi ta varibasika a jam tɛŋka zuk.

¹³ Ka fi ale jam pai fi pagrimu a lab nyakpiemu. Fi mobi ja chichimini zuimaŋa nyiamu po.

¹⁴ Ka fi ale jam ŋɔriŋ duŋ kperikaliika zuimaŋa nyakpiemu po ale pai ka ate ka chim ŋandiinta a te gɔi duŋ sii ale bo sagni po la.

¹⁵ Ka fi ale jam te suik ate bulisa ale bela a buli nyaata. Fi nye ate beli ŋaai ale a chali nyaata la a kpieri.

¹⁶ Kantueŋka ale yokku mɛ, ka fi ale soa. Fi ale nye wenbinni ale chiika.

¹⁷ Ka fi ale dueni tɛŋka ale doa la banaŋa meena. Ka fi ale nye wenkarik ale yoei wen.

¹⁸ Naawen yaa, teeri dachiaka ale a la fu diila, ate betta nyam biisi a kaasi fi yuenni diila.

¹⁹ Kan pai fi nangbaŋka a te gɔi duŋsa ate si ŋɔbi. Kan baŋ fi nuru baai ale a nam la nyuvooŋa wari taam wuu.

²⁰ Poli fi nɔiyeŋka ate fi dueni la zuk, dii nyiŋla wɔkwɔk tuima ale sueri tɛŋka juijui ate legi a boro la.

²¹ Kan te baai ate ba ta a namsi la a dɛ chivie. Basi ate ŋanjaksa ale baai ale a silim la a pak fi yuenni.

²² Wen yaa, yiti zaani a zɛri fidek nyiŋ. Teeri bettaŋa ale a la fu dii danni meena po la.

²³ Kan cheem kpai a te fi dachaasaŋa ale a weeni diila ale ba tugurik kaarika ale kasim a jueli la.