Yiila 72 - WEN GBAŊKA

¹ Wen yaa, te naawa fi buusaŋa, abe fi te naawa nidoabinni fi wayɔrisima.

² Wa le bo fi nuruma buusa ale wayɔrisima, abe wa bo fi nuru baai ate ba a namsi ba la ale wensie.

³ Guutaŋa ale ta jigsika a jam te nuruma abe pimpitimaŋa a yɔni wayɔrisima yɔna.

⁴ Wa le maari baai ale bo nuruma po ate ba ta a namsi la, abe wa vari nuru baai bisa ale a silim la a basi. Wa le ŋɔriŋ baai ale a namsi nuruba la.

⁵ Ase wenbinni ale chiika ale boro diila, wa mɛ ale kasim boro ka dila a ta ga paari gaŋsa meena wuu zuk.

⁶ Wa ale nye ase ka ŋmoruk ale a ni a tagli wuuk kuui ate ba ŋari la, abe wa ŋman nye ase ŋmoruk kapiak ale ni a zaŋti tɛŋka diila.

⁷ Wa daaŋa po, wayɔrisima nyama nyiŋsaŋa ale foli. Suiyɔgni yega ale kasim a boro ate ku a ga paari diipo ate chiika a kan ŋman boro.

⁸ Wa le dɛ naam nyakpientaŋa meena zuk, abe wa ŋman dɛ naam a zaani Benni a ta ga paari tɛŋka kpeglimka.

⁹ Buui dii ale nyini tintain busuŋku la ale kpi duna wa niŋ, abe wa dachaasaŋa a mɔk tanta.

¹⁰ Tarsis nalimaŋa ale tɛŋ sii ale yalima ate nyaata a gilim si la ale ta tutuna a jam te wa. Siiba ale Sɛba nalimaŋa ale ta tiirim tii a jam te wa.

¹¹ Nalima meena ale kpi duna wa niŋ, abe tɛŋ kpieŋsa meena ale tom a te wa.

¹² Wa le yeeri baai ale a silim la ba kumsaŋa po a basi, abe wa maari baai ale a nam ate nuru karo a maari ba la.

¹³ Wa jiirim ale dari ŋanwobisisaŋa ale baai ale a silim la, abe wa vari baai ale a silim la a nyini kum po a basi.

¹⁴ Wa le yeeri ba a nyini ninam ale wɔkwɔk po, dii nyiŋla ba ziimu a ta ka tuilum a te wa.

¹⁵ Wa abe goa a beni. Ba abe ta ligmɔniŋ a nyini Siiba a jam te wa. Nuruba abe kasim a puusi a te wa, abe ba kasim a niak wa danni meena po.

¹⁶ Basi ate ŋandiinta a sueri tɛŋka zuk. Ŋa be poom tagli guutaŋa mɛ zuk. Basi ate ŋa yɔnaŋa a nye nna se Lebanon tiisaŋa yɔnaŋa ale a nye diila, abe si nye ase wuyiiba ale a na pusi kaduk po diila.

¹⁷ Wa yuenni abe kasim boro taam wuu. Di abe kasim a boro nna se vanni ale a veenti ate wenbinni a pusi diila. Wala nyiŋ tɛŋ kpieŋsa meena ale nya suipeentik, ate ba yaa wi wa ayen suipeentik nyɔnɔ.

¹⁸ Pimpauk abe bo Naawen dii ale ka Wen la jigi, Izirali Wenni, waai nyiini ale a tom wakinkagla la.

¹⁹ Pimpauk abe bo wa yuei dii ale ta zula la jigi taam wuu. Tɛŋka meena abe sueri ale wa zulaŋa. Ku be nye dila a ŋman pilim a nye dila.

²⁰ Jese nidoabinni Deevid puusaŋa kpeglimka jigi ale dela.