Yiila 71 - WEN GBAŊKA

¹ Ka fi po, Naawen yaa, ate m suk m dek, kan te chivie a yik mu.

² Pai fi wayɔrisimaŋa a vari mu a basi. Te fi tunni a wom mu, abe fi vari mu a basi.

³ Chim piuŋ a lik mu, chim ase kpaliŋ yeri dii ale pagra la a vari mu a basi. Dii nyiŋla fi ale m piuŋ ale m yepagrik.

⁴ M Wen yaa, yeeri mu a nyini gaasa nyam nisima po a basi, abe fi kan te biem ale ninpagra nyam a paari mu a yigi.

⁵ M Nyɔnɔwa waai ale ka Naawen yaa, ka fi ale chim m yiila ale m sebchakka a nyini m paalim po.

⁶ A din nyini m biam po, m din zak a nya ka fi. Ka fi ale ta mu a nyini m mawa ponni po. M le pak fu diipo meena.

⁷ Mi chim ka daana a te nuru boari, alege ka fi ale m sukka jigi.

⁸ Pimpauk ale sueri m nɔnni po, ate mi yaa kasim a mooli fi nalimu wie danni meena po.

⁹ Kan pai mu a basi ase m nin jam kpaŋmu. Be kan zɛri mu ase m pagrimu a nin nueri.

¹⁰ Dii nyiŋla m dachaasaŋa a biisi ka m wie. Baai ale a yaali ayen ba ko mu la a zɔk kama ale chaab.

¹¹ Ba a weeni ayen, <>

¹² Wen yaa, kan cheŋ yaliŋ abe fi ge mu. M Wen yaa, a nye nwuli ate fi maari mu.

¹³ Basi ate baai ale potim m nyiŋla a dɛ chivie kpi. Basi ate baai ale a yaali ayen ba daani mu la, kanpiinta ale chivie a yik ba.

¹⁴ Alege dan ka mi, m le kasim a ta ka yiila ale fu. M le kasim a pak fu nna yegayega.

¹⁵ M nɔngbanni ale weeni fi wayɔrisimaŋa ale fi varibasika wie, m be poom zɛ ŋa ale a magsi ŋa soa diila.

¹⁶ M Nyɔnɔwa waai ale ka Naawen yaa, m le mooli fi wakpiemaŋa ate fi nye la ate ba wom, fi nyiini, wayɔrisimaŋa wie ate mi ale mooli.

¹⁷ Wen yaa, a nyini m paalim po, fi sak mu kama ate jinla danni, mi a mooli fi wakinkagla tuimaŋa.

¹⁸ Wen yaa, m dan poom kpaŋmu a ta zupiila, kan zɛri mu, ate ku jam paari diipo ate mi ale weeni fi pagrimu wie a sak gaŋ kaai ale pai a saŋ la ale baai meena ale za ba jam la.

¹⁹ Wen yaa, fi wayɔrisimaŋa a paari wenzukku kama, fi waai ale nye wakpiema la. Wen yaa, ka wana ale a nye ase fi la?

²⁰ Fi basi ate m nya daanika yegayega ale watuasa, fi ale ŋman nye ate m chim m nyiem ale ka diila. A nyini tɛŋka liuŋku po ate fi le ŋman yeeri mu a nyini du a ta mu a jueli ŋmai.

²¹ Fi le nye ate m zulaŋa a zuak abe fi yɔk m suinni a te mu.

²² Fi wensieŋa nyiŋ, m Wen yaa, m le nak kpanuŋ a pak fu. M le pai baganiŋ a lenni pimpauk yiila a te waai ate wadek wa nyiini a Welema a bo Izirali la.

²³ M dan boro a lenni pimpauk yiila a te fu, m nɔnni ale nye masim nuemka ate fi waai ale da tuesi mu la.

²⁴ M giŋgeluŋku ale weeni fi wayɔrisima tuimaŋa daa meena, baai ale a yaali ayen ba daani mu la, a jo ka chivie ale butuma po.