Yiila 7 - WEN GBAŊKA

¹ Naawen yaa, mi Wenni, mi a jam ka fi jigi ayen fi lik mu. Vari mu baai ale a vi mu ayen ba yik la nisima po a basi.

² Dan kan daa di ba le dari mu a passi ase gbeŋli a nin yik mu de le dari mu a passi diila. Ba le gebi mu nna munamuna waai a kan boro a vari mu a basi.

³ Naawen mi Wen yaa, ase mi a dan nye nna ate biem a bo mi nisa po,

⁴ ase mi a dan nye waai ale kan nye wari la a kaasi yaase m vari m dachiak ate ku an va ku suiwa,

⁵ be basi ate m dachaasaŋa a vi a yik mu. Basi ate ba tabi mu lɔnsi a ko, ate m kpi dua tantaŋa po.

⁶ Naawen yaa, yiti ale fi suipuurumu a ta chaab ale m dachaasaŋa ale ba suipuurumu. Yiti, mi Wen yaa, a sak wensie.

⁷ Dila la nuru baai meena ale gilim fu la, ta ba jam jigi yeŋ a yaa kali wenŋmazuk a nya ba zuk.

⁸ Basi ate Naawen a bo nurubisa buusa. Bo mi buusa, a magsi chaab ale m wayɔrisimaŋa, a magsi chaab ale m nyemagsika. Fi Waai Ale Bo Wenŋmazuk La.

⁹ Fi ka wayɔrisima Wen a seba tama ale ta popola ŋaai alege a yaali diila buusa. Kasi wabaata nyama gaasaŋa abe fi te nuru wayɔrisima nyam zaana jigi.

¹⁰ Wen ka m ligrɔ Waai Ale Bo Wenŋmazuk La, wa a vari baai ale ka nuru maŋsaŋa la a basi kama.

¹¹ Wen ka wayɔrisima boteerɔ. Wa ka waai ale a sak wa suipuurumu daa meena.

¹² Ba dan kan tagri ba suitaŋa, Wen ale saasi wa gebika. Wa gori wa tommu kama a gomsi magsi.

¹³ Wa gomsi wa peinyaamaŋa kama, wa gomsi wa pein ŋaai ale tɔŋ a cheŋ ale bolim la kama.

¹⁴ Nuru waai ale a magsi biem lɔgi la, a yik ka daanika puuk a yaa biak venta.

¹⁵ Nuru waai ale a tu goluk a magsi wa choa lɔ du la ale lɔ du wadek.

¹⁶ Daani kaai ate wa a nye la ale tulim a jam wadek zuk. Wa vakvakka a jam ka wadek zuk.

¹⁷ Mi le pai jiam a te Naawen wa wayɔrisimaŋa nyiŋ, abe m yi yiila a pak Naawen Dii Ale Bo Wenŋmazuk La yuenni.