Yiila 68 - WEN GBAŊKA

¹ Basi ate Wen vaari yiti ŋmai, ate wa dachaasaŋa a waaŋ chaab. Te ate wa kisidɔma a yiti cheŋ bɛ wa niŋ.

² Fuk ba a basi, ase viok ale a fuk nyuisa a basi diila. Ase samparima ale a nyaliŋ bolim po diila, te ate gaasa nyama a kpi Wen niŋ.

³ Alege basi ate wayɔrisima nyama a ta suipeentik abe ba a dɛ masim Wen niŋ. Ba be ta popeentik abe ba dɛ masim.

⁴ Ni lenni yiila a te Wen, ni lenni yiila a seni wa yuenni, ni pak waai ale dɔ chiŋmaaŋa la, wa yuenni ale Naawen, ni abe a dɛ masim wa niŋ.

⁵ Wa ka kpiŋsa ko, ale ŋman chim waai ale a maari pukɔga, wa ka Wen dii ale bo wa weleŋsa jigini.

⁶ Wen a yaali ka dɔkdem a te baai ale ka badek ba nyiini la, wa abe ŋman a dɛ baai ate ba lik ba la niŋ ale ka yiila yika. Alege tukpari nyama a ni bo ka kantueŋ tɛŋ po.

⁷ Wen yaa, ase fi ale nyini a dɛ nuruma niŋ la, fi ale gɔk santiri a va tɛŋ kaai ale doa kinla la,

⁸ tɛŋka a choa kama, ate wenzukku a lak ate ŋmoruk a siŋ, Wen niŋ, Waai ale soa Sinai la, Wen niŋ, Izirali Wenni.

⁹ Wen yaa, fi te ka ŋmoruk yegayega. Fi a ŋman te baai ale jiagi ate fi a soa ba la ka nyiŋ pagra.

¹⁰ Fi nuruma ale kali ka po, Wen yaa, fi ale te ŋanjaksa a ta nyini fi yegayega po.

¹¹ Nyɔnɔwa a mooli wa wanni, ate baai ale chɔgsi a biisi di la a piisi,

¹² <

¹³ Ni le dua bottaŋa suŋsuŋ a goa la, mi nangbaŋka kiŋkaŋŋa a lik ale ka kpana, ka kɔbtaŋa a lik ale ka ligmɔniŋ kaai ale a nyaksi la.>>

¹⁴ Wen Dii Ale A Niak La ale waaŋ tɛŋka nalimaŋa la, ku jam nye ase ka ŋmoruk tana ale a lo Zalmon zuk la.

¹⁵ Basan guutaŋa a nala kama, ti abe bo ka wen nna yegayega.

¹⁶ Ka boan nyiŋ ate Basan guutaŋa ale bo wen nna yegayega la, a zak a nya guuk kuui ate Wen a lueri ayen wa soa a nya taam wuu la ale nyuri ya, juijui ate Naawen dek a za wa kasim a boro taam wuu la?

¹⁷ Wen wusuma torokoma ka tusa piisa ale tusa tusa. Nyɔnɔwa a nyini ka Sinai a jam wa dɔkku po.

¹⁸ Fi a ni jueli wenŋmazuk la, fi dɛ ka ligrɔba niŋ. Fi tuesi ka tiirita nuruba jigi, baai ale poom ka a wom fi nɔi la, ayen fi Naawen dii ale ka Wen la yaa be le bo dula.

¹⁹ Pimpauk abe bo Nyɔnɔwa waai ale ka Wen ti Varibasidɔwa waai ale a ji ti jibtaŋa daa meena la.

²⁰ Ti Wenni ka Wen dii ale vari a basi. Nyɔnɔwa waai ale ka Naawen nyiŋ ate ti chali a bɛ kum.

²¹ Chekki Wen ale ŋɔriŋ wa dachaasaŋa zuima, baai ale ta naam zuisa zutɔksa a kasim nye biem a cheŋ la.

²² Nyɔnɔwa a weeni ayen, <

²³ ate ni pai ni naŋsaŋa a lusi ni dachaasaŋa ziimu po, ate ni baasaŋa giŋgeluŋtaŋa mɛ a nya ti charuk.>>

²⁴ Wen yaa, fi chelimu a nyini ka peelim, mi Wenni ale m Naawa ale cheŋ a jo wa weleŋsa bo ka jigini po la a nyini peelim kama.

²⁵ Yi yiirisaŋa ale dɛ ba niŋ, ate ŋannagrisa a bo ba ŋaaŋ, ate nipokbilisa a bo ale ba a nak sinyaksa.

²⁶ Pak Wen tigsuŋ kpioŋku suŋsuŋ. Pak Naawen Izirali demma tigsuŋku suŋsuŋ.

²⁷ Benjamin buuni ale fiisa la ale la, a dɛ ba niŋ ale Juda nabisaŋa ale ka nuru boari, ate Zebulun ale Nafitali nabisaŋa mɛ a pa vi.

²⁸ Wen yaa, wi fi pagrimu. Wen yaa, sak ti fi pagrimu ase fi le poom a jam liŋ a nye diila.

²⁹ Fi yenni ale bo Jerusalem la nyiŋ, nalima ale ta tiirita a jam te fu.

³⁰ Toariŋ gɔi duŋsaŋa ale bo wuwoŋtaŋa po la, ale lalisaŋa ale bo tɛŋsaŋa naabisaŋa po la. Yik m dek, ale ta kpana sandaa a jam. Basi ate tɛŋ sii ale a yaali kpaliŋ la a waaŋ chaab.

³¹ Nuruba ale tom chaab ŋaaŋ a nyini Ejipiti jam. Kus ale siak pai wadek a te Wen.

³² Tɛŋzuk dɛ tɛŋsa ate nalima a soa si la lenni yiila a te Wen, ni lenni yiila a pak Nyɔnɔwa,

³³ waai ale do dipo wenzuk chiŋmaaŋa la, waai ale a na ale lueluk pagrik la.

³⁴ Ni mooli Wen pagrimu. Waai ate wa pagrim a bo Izirali zuk la, ate wa pagrimu a bo chiŋmaaŋa po la.

³⁵ Wen yaa, fi potim ta zula kama fi weleŋsa bo ka jigini po. Izirali Wenni a te wa nuruma ka pagrim ale nyiŋ pagra. Pimpauk a cheŋ Wen jigi.