Yiila 66 - WEN GBAŊKA

¹ Tɛŋka meena, ni nye masim nuemka a te Wen.

² Ni lenni wa zulaŋa yuenni yiila. Ni nye ate wa pimpaukku a ta zula.

³ Ni weeni Wen ayen, Wa tuimaŋa ka tuimkperikaliisa. Fi pagrimu a zuak ate dila basi ate fi dachaasaŋa nyiŋsa a gɔk fi niŋ.

⁴ Tɛŋka meena demma a kpi ka duna fi niŋ. Ba a lenni ka pimpauk yiila a te fu ale ŋman lenni pimpauk yiila mɛ a te fi yuenni.

⁵ Ni jam nya Wen ale tom diila, wa ale nye wakinkagla ŋaai a te nuruba la.

⁶ Wa labri nyakpiemu ate bu chim tɛŋ kosik, ate ba cheŋ naŋsa nyiamu suŋsuŋ a taam, ni be jam ate ti dɛ masim wa jigi.

⁷ Wa ta ka wa pagrimu a dɛ wa naamu, ate wa ninaŋa a nya tɛŋsaŋa, be kan te ate baai ale a yaali kpaliŋsa nyeka la a yiti ŋmai ya.

⁸ Nuruba, ni pak ti Wenni, ni basi ate ba wom wa pimpaukku nuemka.

⁹ Wa lik ti nyuvooŋa kama ale an basi ate ti naŋsa a tabi a sati.

¹⁰ Wen yaa, fi chamsi ti kama, a pai ti nyo bolim po a soti ti ase kpana la.

¹¹ Fi ta ti kama a jam likka dɔk po ale ŋman pai jibta a vi ti ŋaaŋsaŋa zuk.

¹² Fi basi ate nuruba a va ti zuima zuk a taam. Ti va bolim ale nyiam po a taam, alege fi ta ti kama a ŋman jam kauk kuui ate ŋanta yegayega a boro la.

¹³ M le jam fi yenni po ale juka tiirita abe m nye m le puulim dii a ni fi la,

¹⁴ pumpuulim ŋaai ate m lak nɔngbanvaataŋa a puulim la, ate m nɔnni mɛ a biisi wie ŋaai diipo ate m bo daanika po la.

¹⁵ M le kaab duŋ sii ale biigi la a te fu ale tiirim padaasa. M le te fu lalisa ale bua.

¹⁶ Ni jam wom, nama baai ale a chali Wen la. Ni basi ate m weeni ni wa le nye dii a te mi la.

¹⁷ Mi pai m nɔnni kama a kaari a wi wa. Wa pimpauk ale jam bo m giŋgeluŋ zuk.

¹⁸ Ase m dan ta wabiok m suinummu po, Nyɔnɔwa ate an wom ya,

¹⁹ alege Wen a sum wom kama, ale wom m lueluku puusa po.

²⁰ Pimpauk abe bo Wen jigi, waai ale kan zɛri m puusa yaase wa peri wa ŋmanteka a nyini m jigi la.