Yiila 65 - WEN GBAŊKA

¹ Wen yaa, pimpauk a bo Zayon a limisi fu. Ti le nye ti ale puulim diila a te fu.

² Fi waai a ni a wom puusa la, nuru meena a cheen ka fi jigi.

³ Wabaata ale jam gilim ti la, fi jam vɔŋ ti nye kaasika a te ti kama.

⁴ Suipeentik a bo ale baai ate fi a lueri la, ale ta ba jam moata ayen ba bo fi dabaasaŋa po. Ti chak kama ale fi yenni wamaŋsaŋa, ale fi weleŋsa yenni.

⁵ Ti Varibasidɔ Wen yaa, fi pa ka wayɔrisima tuima a tulisi ti, ate tɛŋka kpeglimka meena ale nyakpiemu a ni doa a yalima a soa diila yiila meena a boka fi zuk,

⁶ fi ale nye guutaŋa ale fi pagrimu ale gomsi fidek ale pagrim a za a magsi kpaliŋ.

⁷ Fi weeni ate nyakpientaŋa wuurika a goori ate ti nyamiisaŋa a muriŋ bɛ ale basi ate tɛŋsaŋa nuruma ale a nuem la a nye diki.

⁸ Baai ale bo juijui ate ku yalima la, a yɔgsa ale fi wakinkaglaŋa kama. Ta nyini wenbinni pusika a ta ga paari siŋka, fi a wi a yaali ka masim yiila.

⁹ Fi a nya tɛŋka zuk kama ale a zaŋti ka ale nyiam. Fi basi ate ŋandiinta a nye nalimnyiini ka zuk. Wen beli naŋsaŋa a sueri ale ka nyiam ayen nuruma a nya ŋandiinta, ka fi ale weeni ayen dii a nye la, ale la.

¹⁰ Fi tagli tɛŋka ale ka nyiam ale chalisi ka kunkutimaŋa a soa si chaab la. Fi pai fi ŋmorukku a zaŋti ka ate ka baasa ale niak ka ŋanborintaŋa.

¹¹ Fi basi ate benni a nala ale basi ate ŋandiinta a boro nna yegayega.

¹² Fi basi ate kanpuurinsaŋa a maa nyini wuuk, ate guutaŋa a sueri ale suipeentik.

¹³ Piisa ale bo wuuku po a dɛ, ate ŋandiinta a piisi vaasaŋa po. Ba a nye ka masim nuemka ale a yi yiila.