Yiila 64 - WEN GBAŊKA

¹ Wen yaa, wom mu ase m le lak m lueluku a fɔbili la. Lik m nyuvunni a nyini dachiaka nyinyigsaŋa po.

² Pai mu suk nyini gaasa nyɔnɔwa popola baataŋa jigi ale nuru baataŋa nuemka po.

³ Ba saasi ba giŋgeluŋtaŋa ase ka gebik woŋsa la, ate ba nɔngbaaŋa po wieŋa mɛ ase pein yaama la.

⁴ Ba mak doa kama a tɔŋ nuru waai ale kan ta wakaasuŋ la. Ba deri a tɔŋ diiri wa kama, ate yɔgsum a poom a ka ba.

⁵ Ba a te chaab nyiŋbiiri a va chaab ale ba popola baataŋa, ba a biisi ka ba battaŋa suk barika wie. Ba a weeni kama ayen ka wana ale wa nya ti?

⁶ Ba a poli ka biem wie ale a weeni ayen, ti poli ka wamaŋ. Chekki, nuru popola ale wa suinum a sueri ale ka pimpaasima.

⁷ Alege Wen ale tɔŋ ba ale peema. Ba ga a nya la ale ba kɔni kama.

⁸ Wa le basi ate badek giŋgeluŋta a cheem ji badek, abe wa basi ate ba yeeŋa a chim guuta. Baai meena ale pai nina a tu ba la, le girinti ba zuima abe ba poom ka a te ba zula.

⁹ Yɔgsum ale yik nuru meena. Ba ale mooli Wen tuimaŋa wie, abe ba poli wa ale nye diila.

¹⁰ Basi ate wayɔrisima nyam a dɛ masim Naawen jigi, abe ba suk badek wa jigi. Te ate baai suiniima ale nala la a pak wa.