Yiila 60 - WEN GBAŊKA

¹ Wen yaa, Fi zɛri ti kama ale ŋman sak Fi suipuurumu ti zuk. Fi sui a puuri ale ti alege yɔgyɔgla de be ŋman tuesi ti.

² Fi choa tɛŋka kama ale yik ka a nak mobi lagri. Be ŋman lik ka muulisaŋa dii nyiŋla ka a choa kama.

³ Fi basi ate ku pagra a te ti. Fi te ti daam ate ti nyu ate ku nye ate ti a ja.

⁴ Fi pai ka tikti a te baai ale a chali fu la, ayen ba zak a sak wensieŋa nyiŋ.

⁵ Vari ti a basi abe fi maari ti ale fi Juga nisaŋa, ate baai Fi a yaali la a nya varibasika.

⁶ Wen a biisi wa dɔkku po ayen, <

⁷ Gilead ka Mi ale soa. Manasa ka Mi ale soa. Ɛfraim ka Mi kuta zukchin. Juda Mi tachek,

⁸ Moab ka Mi chin narinni, Edom zuk Mi tɔŋ m nuensiri, Filistia zuk Mi kaari ale nakdeka.>>

⁹ Ka wana ale wa ta mi jam tɛŋ kaai ale ta parik pagrisaŋa la? Ka wana ale wa dɛ mi niŋ a ta mu cheŋ Edom?

¹⁰ Daa Fi, Wen yaa, Fi waai ale zɛri ti ale kan va ti tugurik tɔŋdɔma a nyini la?

¹¹ Te ti maarika ate ti tu dachiaka, ale nurubiik maarika a ka kiri ya.

¹² Wen nyiŋ ti nya pagrim, ate wa lɔnsi ti dachaasaŋa tɛŋ.