Yiila 59 - WEN GBAŊKA

¹ Wen yaa, vari mu m dachaasaŋa nisima po a basi, lik mu a tanla ate baai ale kisi mu la a kan nya mu.

² Vari mu nuru baata nisima po a basi, abe fi vari mu nuru koorisa nisima po a basi.

³ Naawen yaa, nya ba le lɔ a gu dua a limisi mu la, nuru koorisaŋa a nye ka nɔiyeŋ ayen ba ko mu. M be an kaasi ba wari ya.

⁴ Mi an kaasi wari ya, alege ba gomsi kpaliŋ nyeka ale mu. Yiti a wom mu abe fi maari mu.

⁵ Naawen yaa, Wen Dii Ale A Dɛ Tugurik Tɔŋdɔma Niŋ La, Izirali Wenni, vaari yiti a namsi tɛŋ baataŋa. Kan ta jiirim ale gaasa nuru baai ale a bobri la.

⁶ Ba ŋman pilim a jam ka junɔi geŋ a ŋuuni a gilim tɛŋka ase baasa la.

⁷ Nya dii ale nyini ba noaŋa po a nyini la, ba biika ka gebisa, ate ba yaa weeni ayen, <>

⁸ Alege Naawen yaa, fi kala a la ba kama. Fi a nye tɛŋ sila meena a la kama.

⁹ M Pagrɔ, mi zak a nya ka fi, Wen yaa, ka fi ale m yepagrik,

¹⁰ Wen dii ale ta ŋmanteka le mu la, le dɛ m niŋ ate m nya nakdeka a nyini baai ale velim a te mu la zuk.

¹¹ Alege ti Nyɔnɔ ale ti ligrɔ, kan ko ba. Dii nyiŋla fi dan ko ba, mi nuruma ale baŋ. Pai fi pagrimu a nye ate ba nyiem gilim jigi meena, abe fi yaa ge basi ate ba siŋ tɛŋ.

¹² Ba noaŋa po biem wieŋa nyiŋ ale ba noaŋa po wieŋa nyiŋ ale ba kikaasaŋa ale ba venta wieŋa nyiŋ ale ba kanjantaŋa nyiŋ, basi ate ba yik ba a ta cheŋ,

¹³ pai fi suipuurumu a kaasi ba. Kaasi ba meena ate ba waai a kan ŋman boro. Ate tɛŋka meena a miŋ ayen ka Wen ale soa Jekob zuk a nya.

¹⁴ Ba ŋman pilim a jam ka junɔi geŋ a ŋuuni a gilim tɛŋka ase baasa la.

¹⁵ Ba a gilim jigi meena a tuilum ŋandiinta ale a ŋaasi ase baai ale kan chak la.

¹⁶ Alege mi le lenni yiila a magsi chaab ale Fi pagrimu, saluik po m le lenni yiila a magsi chaab ale Fi ŋmanteka. Dii nyiŋla, ka Fi ale m yepagrik ale m sukka jigi ase m nin bo daanika po.

¹⁷ M le lenni pimpauk yiila a te m Pagrɔwa. M ŋmanteka Wen yaa, ka Fi ale m yepagrik.