Yiila 57 - WEN GBAŊKA

¹ Wen yaa, ta jiirim ale mu, ta jiirim ale mu, dii nyiŋla ka Fi po ate m chiika a nya sukka jigi. M le suk m dek ka Fi kinkaŋŋa yisuŋku po a ta paari diipo ate kaasuŋ a taam la.

² M kaari wi Wen Dii Ale Bo Wenŋmazuk La yue, Wen ale nye wa ale ta popola ŋaai ale mi la a te mu.

³ Wa kali ka wenŋmazuk a tom ayen wa vari mu a basi. Wa a toariŋ baai ale a vi mu nna tuituili la, Wen a tom wa ŋmanteka ale wa wensieŋa.

⁴ M bo ka gbeŋma suŋsuŋ. Mi a goa ale ka duŋ sii ale a ŋɔbi nuruba la, nuru baai nyina ale a nye ase gbatta ale piema la. Ba giŋgeluŋtaŋa a saasi ase ka gebik woŋsa la.

⁵ Wen yaa, be nya zak zaanika a gaam wenŋmazukku. Basi ate Fi zulaŋa a bo tɛŋka meena zuk.

⁶ Ba yuk ka ŋmiak a basi m naŋsa po. M dua ka tɛŋ ale ninam. Ba daam tu ka goluk ayen m lo du, alege badek a tulim lɔ ku po.

⁷ M suinummu za ka nna giŋgiŋ, Wen yaa. M suinummu za ka giŋgiŋ. M ni lenni yiila a pak Fu.

⁸ M chiiga, vaari yiti ŋmai, kpanuŋ ale baganiŋ, ni vaari yiti ŋmai. M le nak saluiku a yiti.

⁹ M le pak fu, m Nyɔnɔ, tɛŋsaŋa po. M le siak yiila a seni fu nuruma suŋsuŋ.

¹⁰ Diila fi ŋmanteka a zuak kama, a jueli a gaam wenzukku, fi wensieŋa a jueli paari chiŋmaaŋa.

¹¹ Mi a zak fi yuenni ŋmai, Wen yaa, a gaam wenzukku, be te fi zulaŋa a tagli tɛŋka meena.