Yiila 56 - WEN GBAŊKA

¹ Wen yaa, ta jiirim ale mu ale ka nuruba ale a vi mu nna tuituili. Danni meena po ba a kasim a vi mu kama.

² Baai ale velim a te mu la a kasim a vi mu kama danni meena po. Nuruba yegayega a pa ba kanjanta a vi mu.

³ Yɔgsum a dan ta mu, m le ta sebchakka ale ka fi.

⁴ Wen dii wie ate mi a pak la, m ta sebchakka ale Wa kama, m kan chali yɔgsummoa. Nuru a baga mu a nye ka boa?

⁵ Danni meena ba a labri m nɔi po wie. Ba a gomsi kama ayen ba daani mu.

⁶ Ba jam ka jigi yeŋ ayen ba kpesi a nya m naŋ zakka meena, a yaali ayen ba ko mu.

⁷ Wen yaa, kan basi ate ba yuli bɛ. Pa Fi suipuurum a ko tɛŋ sila demma meena.

⁸ Ŋmarisi m kumsaŋa a dueni. Ŋmarisi a nyo Fi gbaŋka, Fi poom ŋmarisi a dueni ya?

⁹ Ate m dachaasaŋa ale yiti a chali ase m nin wi ayen fi maari mu. Kude ale basi ate m seba ayen ka Wen ale soa mu.

¹⁰ Wen dii wari ate mi a pak la, Naawen wari ate mi a pak, wala wari ate m a pak.

¹¹ M ta sebchakka ale ka Wen. M kan chali yɔgsummoa. Nuru ale baga nye mu ka boa?

¹² Wen yaa, m puulim kama ale Fu. M le ta m jiam tiiritaŋa a jam te Fu.

¹³ Dii nyiŋla, Fi vari mu kum po a basi ale basi ate m kan ja. Dila yaa basi kama ate m baga a paari Wen niŋ ŋanvutaŋa tɛŋka po.