Yiila 55 - WEN GBAŊKA

¹ Wom m puusa, Wen yaa, kan zɛri m le a saalim a yaali maarika.

² Wom abe fi tulisi mu. M popolaŋa a daani mu kama a ta mu a cheŋ yesiŋsa po.

³ M dan wom m dachaasaŋa luelutaŋa, ale nya ba fifioku, dila basi kama ate m kpaziim a nak. Dii nyiŋla ba ta ka ninam a jam m zuk, ale ŋman pai ba suipuurum a kisi mu.

⁴ Kpazinagsuk ale bo m suinum po, kum yɔgsum a baga mu.

⁵ Yɔgsum ale kpazinagsuk ale yik mu. Nyinyigsa ale nya pagrim m zuk.

⁶ <

7 M ti ni yiri a cheŋ niŋniŋa a ga bo sagni po a vuusi.

⁸ M le kpabi kama a ta m dek a ga lirim, lirimka dek jigi ate vamuniŋka ale nanpansaŋa a ka nya mu.>>

⁹ Nyɔnɔ, butim gaasa nyama abe fi labi ba biisaŋa, dii nyiŋla m nya ale ka varuk ale kpaliŋ ale bo tɛŋka po.

¹⁰ Kantueŋ ale yok meena ba gu gilim ba tɛŋka parisaŋa kama. Gaasa ale tuim kaasima ale bo ka po.

¹¹ Yik kaasirɔba ale bo tɛŋka po a kaasi a cheŋ, nyinyigsa ale venta ale kasim sueri ka po.

¹² Dan ka m dachiak ale a lɛ mu nna, m te le baga pik. Dan ka m kaasirɔ ale a fuusi a jueli m zuk nna, m te le suk ate wa kan nya mu.

¹³ Alege fi, ka nuru ase mi la, m vaanchoa, m dek doa mabiik,

¹⁴ waai ate mi ale wa a jam dɛ masim ale chaab la ase ti nyiem ale va chaab a cheŋ Wen yenni po a puusi la.

¹⁵ Basi ate kum a jam diiri m dachaasaŋa a pa ba a ta cheŋ. Basi ate ba siŋ vɔrup ase ba ale vua la. Dii nyiŋla biem ale kasim bo ale ba.

¹⁶ Alege mi ale wi Wen ate Naawen a vari mu a basi.

¹⁷ Saluik ale kantueŋ ale junɔi m kaari a wi Wen ate Wa a wom m lueluku.

¹⁸ Wa yik mu a tara ate wari a kan nye mu. Baai ale kan siak a te mi la zuk po, ba ale ba piisuŋku meena, wa yeeri mu a nyini tugurik kaai ate ba ta ale mu la po.

¹⁹ Wen dii ale kasim kala wa naamu zuk taam wuu la, ale wom ba abe wa namsi ba. Nuru baai ale kan maari a tagri ba suita a kan chali Wen yɔgsum la.

²⁰ Mi vaanchoawa a yaa tɔŋ ka tugurik ale wa doama, nɔiyeŋka ate ti daam ta la, wa yik kaasi ya.

²¹ Wa biika a saala ka nna bɔlibɔli ase kpaam la, alege wa suinummu po, wa ka kpaliŋ kpaliŋdɔ, wa nɔi po wie a saala a gaam kpaŋiak alege ŋa ka gebik a gebi nuruba.

²² Pa fi wadaanimaŋa a te Naawen ale wa le lik fu a tara. Wa kan basi ate wayɔrisima nyama a lɔ.

²³ Alege Fi, Wen yaa, ale basi ate gaasa nyama a siŋ vɔrup kaasuŋku po. Nuru baai ale a yaali ayen ziim a nyini la ale velimvendisa a kan paari ba daaŋa geli ya. Alege dan ka mi, m le ta sebchakka ale fu.