Yiila 51 - WEN GBAŊKA

¹ Wen yaa, ta jiirim ale mu, a magsi chaab ale fi yaali kaai ale kan a nueri la. Fi ŋmanteka nyiŋ, yeeri m nye kaasuŋku a basi.

² Sugri m kaasuŋku meena a basi, abe fi duisi m biemu a basi.

³ Dii nyiŋla, mi seba m wakaasimaŋa ale m biemu a kasim bo ka m niŋ.

⁴ Ka fi nyiini ale m tom a kaasi, m tom biem fi niŋ. Fi dan biisi, wensie boro kama. Fi be dan bo buusa ŋmiŋmaasa a ka.

⁵ Chekki, ba biak mu ale ka biem, m ka biem nyɔnɔ a nyini diipo ate m mawa a ta m lɔgni la.

⁶ Chekki, ka wensie ate fi a yaali a ta nyini m suinummu po, ate fi a sak mu popo yam.

⁷ Sugri mu ale kpaliok ate m nala, sugri mu ate m peenti tektek.

⁸ Basi ate m wom masim ale popeentik. Basi ate koba ŋaai ate fi ŋɔriŋ la, a dɛ masim.

⁹ Suk fi nina a nyini m wabaataŋa zuk, abe fi yeeri m nye kaasuŋku meena a basi.

¹⁰ Nye m suinummu cheri Wen yaa, abe fi ŋman te mu wamaŋsa nyeka chiik.

¹¹ Kan yiak mu Fi niŋ a basi yaase fi pai Fi Chiika a nyini m jigi ya.

¹² Pilim te mu Fi varibasika masimu, abe fi te mu chiik kaai ale ka basi ate mi a nye fi yaalika la.

¹³ Dila ale te m sak wakaasima nyam fi suiku, ate wabaata nyam a pilim ŋman jam fi jigi.

¹⁴ Wen yaa, vari mu a ta nyini m nuruba koka kaasuŋku po. Fi ka Wen dii ale vari mu a basi, ate m giŋgeluŋku ale lenni fi wayɔrisimaŋa wie.

¹⁵ Nyɔnɔ, lak m nɔngbanvaataŋa ate m nɔnni a pak Fu.

¹⁶ Fi sui a kan peenti ale kaabka, m te le ta jam a te fu. Fi poom kan nya masim a nyini juka tiirita po.

¹⁷ Wen kaabsaŋa ka zaab m dek nyeela. Wen yaa, suinum buui ale zaab bu dek ale ŋman tagri la, Fi kan zɛri bu.

¹⁸ Fi ŋmanteka nyiŋ nye ate Zayon a jigsi. Sɛ Jerusalem parisaŋa.

¹⁹ Dila ale te ate wayɔrisima duŋsa kaabka a boro la, kaab kaai ale a ju meena a peenti Fi sui la, ate ba pa lalisa a te Fu, Fi kuŋkuŋku zuk.