Yiila 5 - WEN GBAŊKA

¹ Wom m wieŋa, Naawen yaa. Poli abe fi nya m niniŋŋa.

² Wom m le kum a yaali maarika la, m dek Naab ale m Wen yaa, ka fi ate m puusi a te.

³ Saluiku po, Naawen yaa, fi ale wom m lueluk. Saluiku m pai mi le a yaali diila a dueni ka fi niŋ ale a limisi ale yiila.

⁴ Fi daa Wen dii ale mariŋ biemmoa, fi jigi wabaata nyama a kan baga a boro.

⁵ Kanjanta nyama a kan baga a zaani fi niŋŋa. Fi kisi baai meena ale nye a kaasi la kama.

⁶ Fi kisi baai ale a velim la kama. Baai ale kasim a yaali ziim nyaka la ale pimpaasima nyam Naawen a kisi ba kama.

⁷ Alege fi ŋmanteka nyiŋ mi le jo fi yenni po. Mi le koori tɛŋ a tuk fi tuilum yenni nyiŋ ale zula.

⁸ Naawen yaa, dɛ m niŋ, a ta mu va fi wayɔrisimaŋa po m dachaasaŋa nyiŋ, basi ate fi suiku a yɔrisi m niŋ.

⁹ Wari a kan nyini ba noa po ate waai a ta siaka ale di. Kaasuŋ ale sueri ba suiniimaŋa po. Ba biika a basi ate ka nuruba a kpi. Ba pai ba noaŋa a biisi ka venta wie.

¹⁰ Weeni ayen ba nye kaasi kama, m dek Wen yaa. Basi ate ba susuga zɔŋŋa a lɔnsi ba. Yiak ba ba wabaata yegayega nyiŋ, diila ba zɛri fi nɔi kama a ta chaab ale fu.

¹¹ Alege baai meena ale jam fi jigi ate fi a lik ba la sue a peenti kama. Ba le kasim a yi ka yiila ale suipeentik. Be lik ba ate baai meena ale a yaali fi yuenni la a ta suipeentik fi nyiŋ.

¹² Naawen yaa, fi a niak wayɔrisima nyam kama. Fi gilim ba kama ale fi ŋmanteka ase jachɔgsim ate fi pai lik ba la.