Yiila 49 - WEN GBAŊKA

¹ Nuruba meena, ni wom wanni de. Ni wom de, baai meena ale bo tɛŋka zuk la.

² Nuru kpienta ale nuru poasinsa, jigsirɔba ale ŋanjaksa. Ni wom de.

³ M nɔnni a weeni ka yam wie, ate m le a poli dii a nyini m suinummu po la a te ka miŋ chakka.

⁴ M le lak m tueŋa a wom wamagsima. M le pai kpanuŋ a tɔk wie kiri.

⁵ Ka boa ate mi a chali yɔgsum ase da baata dai a nin jam m jigi, ase velimvendi sii ale ta gaasa la a nin gilim mu,

⁶ baai ale ta sebchakka ale ba ŋanta ale a kuulim ŋa nyiŋ la?

⁷ Nuru karo a baga da tuesi waai nyuvuri, yaase wa tuni Wen wa nyuvunni nyiŋŋa.

⁸ Nuru nyuvuri da tuesika daa moali ya. Nuru karo a baga a da wa nyuvunni Naawen jigi a soa di a boro,

⁹ ayen wa boro taam wuu ale kan kpi.

¹⁰ Dii nyiŋla waai meena a nya ayen nuru baai ale ta yam la a kpi kama, ase betta ale baai ale kan a poli la ale a kpi ale a basi ba paaruŋ diila.

¹¹ Ba boositaŋa ale a chim ba yie taam wuu, ba dan poom pai ba yueŋa a te tɛŋsa ate ba soa, ka ba boositaŋa ale a chim ba yie taam wuu.

¹² Alege nurubiik ale wa ŋantaŋa meena a kan beni. Wa a nye ase ka duŋ ale a kpi diila.

¹³ Dii ale ku nye baai ale ta mariŋka ale badek la, ale ba ŋaaŋviirɔ baai ale a siak a te ba wieŋa la ale nna.

¹⁴ Ase piisa la, ka boosuku ale ku soa ba, kum ale pai ba a chim ŋandiinta. Nuru baai ale za chekki la ale nya ba zuk ku kpeglimka po. Ba nyiŋsaŋa ale puak vɔrumu po, ate ku le yalima ale ba yie naliŋsaŋa.

¹⁵ Alege Wen ale vari m nyuvunni a nyini vɔrumu po. Wa le sum ta mu a jam wadek jigi.

¹⁶ Kan te ku a daani fu ale nuru waai ale jigsi, ate wa yenni mɛ a kasim nala la.

¹⁷ Dii nyiŋla, wa dan kpi, wa kan pai jaab ta cheŋŋi. Wa nalimu a kan va wa a siŋi.

¹⁸ Wa daam le bo tɛŋzuk de la, wa a poli ayen ka wa ale ta niauŋ ate nuruba mɛ a wi wa busena a pak wa, wa jigsika nyiŋ,

¹⁹ alege wa le gum wa koma gaŋka po, ate ba a kan nya nyuvuri bolimoa.

²⁰ Nuru waai ale jigsi ale ka miŋka la a nye ase ka duŋ sii ale kpi la.