Yiila 48 - WEN GBAŊKA

¹ Naawen a zuak ka yega ku magsi ayen ti pak wa, ti Wenni wa tɛŋ weleŋka po ale wa tuilum guuku zuk.

² Ka ka tɛŋ naluŋ ale ŋman chim tɛŋzuk de meena masim tɛŋ. Guuk kuui ate ba a wi ayen Zayon la, ale chim Naab kpioŋku tɛŋka.

³ Wen dek ale bo Jerusalem kpaliŋ yeeŋa po, Wa le chim Jerusalem ligrɔ.

⁴ Tɛŋka nalimaŋa a dan poom gum chaab, ba dan poom cheŋ niŋ ale chaab,

⁵ ba ale nya ka la, ku cha ba ate ba yiti chali ale yɔgsum.

⁶ Ba nyiŋsaŋa a jam kasim a gɔk ka nna pampam ase nipok puuk ale a dom ayen wa biak biik la.

⁷ Fi kaasi ba ase ka vamuniŋ ale fɔbi Tarsis ŋaaruŋtaŋa a kaasi ti diila.

⁸ Ase ti le wom diila, ti be nya ka dila Naawen Dii Ale A Dɛ Tugurik Tɔŋdɔma Niŋ La tɛŋka po, ti Wen tɛŋka po. Wen abe pobi ka diipo meena wuu.

⁹ Ase ti le a puusi fu fi yenni po la, ti kasim a poli ka fi ŋmanteka wie.

¹⁰ Ase fi yuenni ale ka diila, fi pimpaukku mɛ ka dila tɛŋka meena le dua ga saari la, fi juga nisaŋa a sueri ale ka wayɔrisima.

¹¹ Nuru baai le bo Zayon Guuku zuk la a ta popeentik kama, tɛŋ kpaŋ sii ale bo Juda po la a ta popeentik kama dii nyiŋla, fi a bo buusaŋa ka ŋa suiku po.

¹² Cheŋ Zayon tɛŋka po nya, cheŋ gilim ka a nya, chiini ka yeeŋa.

¹³ Poli ka parik kiblaŋa wie, abe fi zak nya ka diin woŋtaŋa ate ni biisi ba wie a sak buui dii ale bo nama ŋaaŋ la.

¹⁴ Ale Wenni dɛ ka, tama Wen diipo meena wuu. Wa le chim ti ganidoa a ta ga paari nuerika.