Yiila 45 - WEN GBAŊKA

¹ Wamaŋsa ale sueri m popolaŋa ase mi le a gomsi yiini dɛ a te naawa la. Mi nɔnni a nye ase ka ŋmarisidoa maŋ jaŋmarisim la.

² Fi ka nidoa waai ale nala gaam nidoaba meena, fi nɔnni po, ka yam jiirim nyiini ale nyini du a nyini, ase Wen dek ale niak fu dii taam wuu la.

³ Pa fi gebika a yi fi gauŋ, nuru kpioŋŋoa. Lik fidek ale fi nalimu ale fi zulaŋa.

⁴ Fi naamu po naab ale a dɔ wusum diila, dɔ ale nakdeka. Wensie ale yik m dek ale wayɔrisima nyiŋ basi ate fi juga nisaŋa a tom wakpiema.

⁵ Basi ate fi peema ŋaai ale choarisi la a kali naawa dachaasaŋa suiniima. Basi ate tɛŋsaŋa a lɔ fi naŋsa po.

⁶ Wen, fi naamu zaŋgɔŋka a kpi za ka dila taam wuu. Fi naamu tɛŋka po, fi a bɔ ka wensie buusa.

⁷ Fi a yaali ka dii ale nala la ale kisi dii ale bie la. Dila nyiŋla Wen, fi Wenni a basi kama ate fi zuak a gaam fi chaama meena dii nyiŋla, wa bobi fu naam.

⁸ Fi gattaŋa meena a nyuŋ ka nyum masik ase ŋan baai ate ba a wi ayen, mir ale alos ale kassia la. Nalima yie po ba gomsi ale ka yauk nyina. Kpanuŋta yiila a nye kama ate fi sui a peenti.

⁹ Nalima lieba ale bo fi nipok baai ale ta zula la po. Fi juga geŋ naab pok fiak ale su Ofir tɛŋka ligmɔniŋ za.

¹⁰ Liewa, lak turi a wom abe fi poli. Baŋ fi nuruma ale fi kowa yenni wie.

¹¹ Fi chorɔwa naawa a mariŋ fi nalimu kama, te wa zula ale wa ka fi nyɔnɔ.

¹² Taaya Liewa ale jam ale tiirim. Jigsirɔba ale nye ate fi mariŋ ba.

¹³ Naab lie kalika jigi, ka nna naliŋnaliŋŋa, wa garukku ba pai ka ligmɔniŋ a yɔk ku.

¹⁴ Wa le jɔ wa garuk kuui ale a nyaksi nna kpelim kpelim la, ba yaa dɛ wa niŋ a ta wa cheŋ naawa jigi. Ka wa kaliak chaama le maa bani wa a ta wa jam fi jigi.

¹⁵ Ba jɔ naawa yenni po ale ka popeentik.

¹⁶ Fi bisa ale tom fi koma naŋkunni po, fi le nye ate ba chim nabisa tɛŋka meena po.

¹⁷ Mi le te fi yuenni zula buuri meena po, dila nyiŋla tɛŋsaŋa ale kasim a zuli fu taam wuu.