Yiila 44 - WEN GBAŊKA

¹ Wen, tama pa ka ti tue a wom, ti koma a weeni a sak ti, dii ate fi a nye te ba ba vaaŋa po dipo la.

² Fidek ale yiak nuruba ate ba chali ale ge ba tɛŋsa ate tama koma a kali si po. Fi buriŋ nuruma alege basi ate tama koma nya badek.

³ Ku jam daa ba gebik nyiŋ ate ba nya nakdeka tɛŋka zuwa, yaase ba nisa pagrim ale te ba nakdeka. Ku jam ka fi juga nisa pagrim, ale fi nimbidiaka nyaksika, diila fi a yaali ba kama.

⁴ Fi ka m Naab ale m Wen, fi pai nakdeka a te Jekob.

⁵ Fi pagrimu nyiŋ, ti tusi ti dachaasaŋa a ta ga ŋaaŋ, fi yuenni nyiŋ, ti tabi ti dachaasaŋa zuk a taamu.

⁶ M ka sebchakka ale m tommu, m gebika be kan vari mu a basi,

⁷ alege fi te ti nakdeka ti dachaasaŋa zuk, fi pai ti kisidɔma a nyo chivie po.

⁸ Wen nyiŋ ale soa ate tama a nak kuusidi danni meena, ti bɛ le pak fi yuenni diipo meena wuu.

⁹ Alege yɔgyɔgla de fi cheem ti basi ka nakpiak ale chivie, fi an ŋman a dɛ ti tugurik tɔŋdɔma niŋ a ta ba a cheŋ kpaliŋ po.

¹⁰ Fi basi ate ti dachaasaŋa a vi ti ate ti chali alege ate ti kisidɔma a kɔlim jaabuuri meena ale bo ti tɛŋka po la.

¹¹ Fi kati ti kama a waaŋ tɛŋsaŋa po ayen ba ŋɔbi ti ase piisa la.

¹² Fi pai fi nuruma a da ka mɔli ase ba ka ŋankayaata la.

¹³ Fi basi ate chivie a yik ti nuru boari suŋsuŋ. Fi basi ate ba nye ti a la.

¹⁴ Tɛŋsaŋa a ta ka tama wie a biisi diipo meena ale a girinti ba zuima tama nyiŋ.

¹⁵ Chivie ale dua m niŋ danni meena, chivie ale ta mu,

¹⁶ m dachaasaŋa ale a vi mu ale a nye mu biem ale a lɛ mu la nyiŋ.

¹⁷ Wieŋa de meena ale nye ti la, tama an diem baŋ fi wari ya, yaase ti ka wensie ale fi nɔiyeŋka.

¹⁸ Ti suiniimaŋa an nyini fi ŋaaŋ nyini ya. Ti an cheŋ fi suiku a bɛ ya.

¹⁹ Alege fi buriŋ ti a basi ate ti tɛŋka a chim gɔi duŋsa goom jigi. Fi zɛri ti a basi legi kpienni po.

²⁰ Ase ti daam dan baŋ Wen yuenni kama, yaase ti pai tidek a te bɔgluk,

²¹ Wen ate poom nya kama, wa le ka waai ale seba nuruba susuga wie ba suiniima po la.

²² Alege fi nyiŋ, ti a tu kum danni meena. Tama a nye ase ka pa ŋaai ate ba ayen ba tɔgri la.

²³ Nyɔnɔ, yiti! Ka boan nyiŋ ate fi dua a goa? Kan zɛri ti taam wuu.

²⁴ Ka boa ate fi kan nya ti geŋŋa ale baŋ ti niniŋŋa ale namsika?

²⁵ Tama yaa dua ka tantaŋa po. Ate ti nyiŋsaŋa yaa siŋ paari tɛŋ.

²⁶ Be yiti zaani a maari ti, yiti zaani a da tuesi ti a basi dii nyiŋla fi ŋmanteka a ka bain ya.