Yiila 40 - WEN GBAŊKA

¹ Mi yik ka m dek a limisi Naawen, ate wa cheem a wom m kumsa.

² Wa yeeri mu kama goluk kuui ale a sati la po, a yeeri mu bagta po, a pai mu zaani piuŋ zuk a te mu kauk kuui ale zeesa ayen m zaani.

³ Wa pai ka yipaali a nyo m nɔi po, pimpauk yiili a te ti Wenni. Nuruba yega ale nya a chali yɔgsum ate ba ta sebchakka ale Naawen.

⁴ Suipeentik a bo le ka nuru waai ale basi ate Naawen a chim wa mariŋka la jigi. Waai ale kan zak a nya kanjanta nyam la, a kan nya baai ale cheem a nya venta wena.

⁵ Naawen mi Wenni, wakinkagla yega ate fi tom. Wie ŋaai ate fi zɔk te ti la, waai karo a baga a chiini a te fu. M dan poom ayen m biisi a weeni ŋa wari, ŋa zuak ka yega ale weenika.

⁶ Kaabka ale tiirim fi an yaali ya, alege lagri mi tueŋa, juka tiirim ale tom kaasika tiirim fi an bek ya.

⁷ Ate mi yaa weeni ayen, <

⁸ Mi a yaali ayen m nye ka fi yaalika, m dek Wen yaa, fi sinsaŋŋa a bo ka m suinummu po.>>

⁹ Mi le mooli wayɔrisima wie kama tigsuŋ kpioŋku po. Mi an mum m nɔnni ase fi ale seba la, Naawen yaa.

¹⁰ Mi kan suk fi wayɔrisimaŋa m suinummu po, mi a biisi fi wensieŋa ale fi varibasika wie kama. Mi kan suk fi ŋmanteka ale fi wensieŋa tigsuŋ kpioŋku jigi ya.

¹¹ Kan peri fi jiirimu m jigi ya, Naawen yaa. Basi ate fi ŋmanteka ale fi wensieŋa a kasim a lik mu.

¹² Daanika a ka chiina ale gilim mu, m wabaataŋa a nya ka pagrim m zuk, ate mi an baga a nya. A piisi a gaam m zukku zuisaŋa, ate m jɔk yiila.

¹³ Te ti fi sui a peenti, Naawen yaa, vari mu basi. Naawen yaa, jam nwuli a maari mu.

¹⁴ Baai meena ale a gisi ayen ba yeeri mi nyuvunni la a jo chivie ale butimka po, baai meena ale a yaali mi kaasuŋ la a viriŋ a cheŋ ale chivie.

¹⁵ Baai ale a nye mi a la la, yɔgsum yik ba badek chivieŋa po.

¹⁶ Alege baai meena ale a gisi fu la sui ale peenti ale fu, baai meena ale a yaali fi varibasika la a kasim a weeni ayen, <>

¹⁷ Alege mi jaŋ kama a yaali maarika, Nyɔnɔwa abe poli m wari. Fi ka m maarɔ ale m varibasidɔ, m dek Wen yaa, kan beni.