Yiila 37 - WEN GBAŊKA

¹ Kan te ku a daani fu wabaata nyam nyiŋŋa yaase fi a dɛ nyuri ale baai ale a nye wakaasima.

² Diila ase wuuk la ba le ko, ase wusobluk la ba le kpi.

³ Ta sebchakka ale Naawen abe fi a nye wamaŋsa, bo tɛŋka po abe fi a dɛ masim.

⁴ Ta suipeentik ale Naawen ate wa te fu fi suinummu ale a yaali ŋan baai la.

⁵ Pa fi suiku a te Naawen, ta sebchakka ale wa ate wa nye nna,

⁶ wa le basi ate fi wayɔrisimaŋa a nyaksi ase kantueŋ la, fi wensie suiku ase wenzuk suŋsuŋ wenbiri la.

⁷ Zaani chim Naawen niŋ a chiib limisi wa, kan te ku a daani fu ase nuruba wie a nin nye a niagi, ba nin poom a zɔk biem wie.

⁸ Yeeri fidek suipuurum po abe fi cheem basi suipuurum yegayega. Kan te ku a daani fu, ku ta fu a cheŋ ka biem po.

⁹ Ba le gebi wabaata nyam a basi alege baai ale ta yiila ale Naawen la ale tuesi tɛŋka.

¹⁰ Ku kan beni, ate wabaata nyama a kan boro, ba dan poom a gisi ba, ba kan nya ba.

¹¹ Alege baai ale a nye ŋmam la ale tuesi tɛŋka a nya suiyɔgni nna yegayega.

¹² Wabaata nyama a zɔk kama a ta chaab ale wayɔrisima nyama ale a ŋɔbi nyina ale ba,

¹³ alege Nyɔnɔwa a la wabaata nyama kama diila wa seba ayen ba danni a cheena kama.

¹⁴ Wabaata nyama a yeeri ka gebik ale gori tom ayen ba dueni ŋanjaksaŋa ale baai ale a silim ŋanta la, ayen ba ko baai ale nye a magsi la.

¹⁵ Alege ba gebisaŋa ale lu badek suiniima, abe ba timaŋa a wɛ.

¹⁶ Wayɔrisima nyama a dan ta maga ku zunchoŋ wabaata nyam yega jigsika.

¹⁷ Wabaata nyam pagrimu ale nueri, alege Naawen a yik wayɔrisima nyama a ta kama.

¹⁸ Naawen a seba baai ale kan ta kaasuŋ la daaŋa kama, ba le tuesi ŋan baai meena la ale boro taam wuu.

¹⁹ Diipo ate kaasuŋ a boro la, ba kan kpi. Diipo ate kɔm a boro la ba le nya ŋandiinta yega a dɛ.

²⁰ Alege wabaata nyama ale kpi. Naawen dachaasaŋa ale nye ase laŋsa po wuuta puuta nalim la. Naawen ale kaasi ba ate ba le muriŋ bɛ, a muriŋ bɛ ase nyuisa la.

²¹ Wabaata nyama a peem kama alege kan tuni, alege wayɔrisima nyama a te ka yegayega.

²² Baai ate Naawen a niak la ale tuesi tɛŋka, alege baai ate wa ka a te la, wa le gebi ba a basi.

²³ Naawen sui a dan peenti ale nuru nyeka wa a basi ate wa a cheŋ ale ka pagrim.

²⁴ Wa dan poom nak naŋ wa kan lɔ, diila Naawen a yik wa kama ale wa nisaŋa.

²⁵ Mi jam paala kama alege yɔgyɔgla a kpaŋ, alege mi an nya ale wa zɛri wayɔrisima nyama yaase ba bisa a juisi ŋandiinta.

²⁶ Ba kasim a te kama yegayega alege a peem a te ba kan zɛri. Ba bisaŋa a nya niauŋ kama.

²⁷ Basi biem nyeka abe fi a nye wamaŋsa, ate fi bo tɛŋka po taam wuu.

²⁸ Naawen a yaali wensie nyam kama, wa be kan basi baai ale ta siaka la. Wa le lik ba taam wuu, wabaata nyam bisaŋa wa le gebi ba a basi.

²⁹ Wayɔrisima nyama ale tuesi tɛŋka a bo ka po taam wuu.

³⁰ Wayɔrisima nyɔnɔ a lak nɔi a biisi ka yam ale a biisi dii ale ka wensie la.

³¹ Wa Wenni sinsaŋŋa a bo ka wa suinummu po. Wa naŋsa a kan tabi a sati.

³² Wabaata nyama a dua kama a limisi wayɔrisima nyama, a gisi ba nyuvooŋa.

³³ Alege Naawen a kan pai ba a basi ba pagrimu po, yaase wa basi ate ba bo mini ba ase ba nin boro a bo ba buusa.

³⁴ Limisi Naawen abe fi yik wa suiku. Wa le zak fu zaani ate fi tuesi tɛŋka. Wa dan gebi wabaata nyama a basi fi le nya.

³⁵ Mi nya wabaata ale gaasa nyɔnɔ kama ate wa nya wadek nna ase tiib ale za tɛŋ maŋ jigi ate bu vaata a sobi la,

³⁶ alege wa deri muriŋ bɛ wa ŋman karo, mi a yaali ayen m nya wa alege m kan nya wa.

³⁷ Poli waai ale kan ta kaasuŋ la wari, kpesi nya wamaŋsa nyɔnɔwa. Nuru waai ale a yaali suiyɔgni la a ta chum kama.

³⁸ Alege ba le kaasi wabaata nyama meena, wa le gebi wabaata nyama chum po a basi.

³⁹ Wayɔrisima nyama varibasika a nyini ka Naawen jigi, wa ale ba pagrɔ a yik ba daanika po.

⁴⁰ Naawen a maari ba ale a vari ba a basi, wa a yeeri ba kama wabaata nyama jigi a vari ba a basi, dii nyiŋla ba a suk ka wa jigi.