Yiila 36 - WEN GBAŊKA

¹ Wari ale bo m suinum po a magsi chaab ale gaasa nyam wabaataŋa. Wen yɔgsum chalika a ka wa nina po.

² Wadek nina po wa a paasi wadek ka nna yegayega ate wa le baga a miŋ yaase wa kisi wa biemu.

³ Wa nɔnni po wieŋa ka gaasa ale pimpaasima. Wa basi yam taka kama ale kan nye wamaŋsa.

⁴ Wa gaduokku zuk wa a zɔk ka biem. Wa pai wadek a te ka biem suik, ale kan zɛri dii ale kan nala la.

⁵ Naawen yaa, fi ŋmanteka a paari ka wenŋmazuk, fi wensieŋa mɛ a paari wen.

⁶ Fi wayɔrisimaŋa a nye ase ka guuk kpienta la. Fi wensieŋa a limisa ka nna yegayega. Naawen yaa, fi a lik nurubiik ale duŋsaŋa kama.

⁷ Tutuna a ka fi yaali kaai ale kan a kpeglim la po. Nuru kpienta ale nuru fiisa a suk bo ka fi kiŋkaŋŋa yisuŋku po.

⁸ Ba a dɛ ka ŋan baai yekka ale bo fi yenni po la, fi a te ba nyiam a nyini fi mariŋka benni po.

⁹ Diila fi jigi ate nyuvuri bulika a boro. Fi bolimu po ate ti a nya bolim.

¹⁰ Kasim ta fi ŋmanteka ale baai ale seba fu la. Fi wayɔrisimaŋa ale baai suiniima ale yɔrisi la.

¹¹ Kan basi ate kanjanta nyama a ta chaab ale mu, yaase gaasa nyam nisa a yiak mu a basi.

¹² Nya waba nyeerisaŋa ale lo dua diila, a yuk ba a lɔnsi, ate ba an baga a yiti.