Yiila 34 - WEN GBAŊKA

¹ Mi le kasim a te Naawen jiam diipo meena. Wa pimpaukku ale kasim bo m nɔi po.

² M chiika ale kuulim Naawen nyiŋ. Basi ate baai ale a nam la a wom abe ba ta popeentik.

³ Ni jam a gum m po ate ti maa chaab a weeni ayen Naawen yuenni a zuaya, ni basi ate ti pak wa yuenni ale chaab.

⁴ M puusi a te Naawen ate wa tulisi mu, ate wa vari mu m yɔgsummu po meena a basi.

⁵ Baai ale zak a nya wa la nimbidaasaŋa a nyaksi kama, chivie an lik ba nimbidaasaŋa.

⁶ Niwobwa dɛ a wi Naawen ate wa wom wa. Wa vari wa wadaanimaŋa po meena a basi.

⁷ Naawen maarɔwa a nya baai ale a chali wa la zuk kama, ale vari ba a basi.

⁸ Lam Naawen a nya ayen wa nala kama. Waai ale pai wadek a te wa la a nya suipeentik kama.

⁹ Wen nuruma, ni zuli Naawen, ale baai ale a zuli wa la a kan yaali jaab a jɔgi.

¹⁰ Gbeŋma a baga a wobsa kama ate kɔm mɛ a ta ŋa, alege baai ale a gisi Naawen la kan silim jamaŋŋa.

¹¹ Ni jam, m bisa, ni wom mi. Mi ale sak ayen Naawen zulaŋa.

¹² Ni waai ale a yaali nyuvuri la, ale a yaali ayen wa daa wɔŋa la,

¹³ kan pai fi nɔnni a biisi biem wie abe fi kan a velimu.

¹⁴ Zɛri biem abe fi a tom wamaŋsa. Gisi suiyɔgni abe fi chali a vi di.

¹⁵ Naawen nimbie a bo ka wayɔrisima nyama zuk ate wa tueŋa a wom ba puusa.

¹⁶ Naawen a kisi baai ale a yaali biem tomka la kama, a yaali ayen wa basi ate ba kan ŋman teeri bala chaab tɛŋzuk de.

¹⁷ Wayɔrisima nyama a puusi a te Naawen ate wa a wom ba. Wa vari ba, ba wadaanima po a basi.

¹⁸ Naawen a moata baai ale kala ate ba sue a kaasi la kama, a vari baai ale kan ŋman ta yiila la a basi.

¹⁹ Wayɔrisima nyɔnɔwa a baga a ta wadaanima ate ŋa a piisi yegayega. Alege Naawen a yeeri wa ŋa meena po kama.

²⁰ Wa lik wa kobaŋa meena kama a tara, dinyi mɛ la a kan wɛ.

²¹ Biem ale ko nuru baataŋa. Dachiak sii meena ale kisi wayɔrisima nyama la, Naawen le bo mini ba.

²² Naawen a da tuesi wadek tomteerɔma a basi kama. Waai a dan pai wadek a te wa, wa kan bo mini wa.