Yiila 33 - WEN GBAŊKA

¹ Wayɔrisima nyama, ni lenni popeentik yiila a te Naawen. Ku ka wamaŋ ayen nuru baai ale za wensie po la a pak wa.

² Pak Naawen ale kpanuŋ, lenni yiila ale miisa pi baganiŋka.

³ Leni yipaali a te wa. Nak ŋannaŋta ale yam, abe fi a nye popeentik nuemka.

⁴ Naawen wanni ka wamaŋ ale ta wensie. Wa ta wensie ale dii meena ate wa nye la kama.

⁵ Naawen a yaali ka wayɔrisima ale wensie buusa boka. Wa ŋmanteka a sueri tɛŋka de zuk kama.

⁶ Naawen wanni ale nye wenŋmazuimaŋa. Wa vuusum nyiini ale pai wenbinni ale chiika ale chiŋmarisaŋa a basi wenŋmazuk.

⁷ Wa tigsi nyakpientaŋa a dueni jigi yeŋ ale pai nya tii ale limisa la a nyo gola ŋaai mɛ ale limisa la po.

⁸ Basi ate tɛŋka meena a chali Naawen yɔgsum. Basi ate nuruba meena a zuli wa.

⁹ Wa biisi kama ate jaab meena a nye. Wa weeni kama, ate jaab meena a zaani.

¹⁰ Naawen a butim tɛŋsaŋa demma zɔŋŋa kama, alege yik nuruba ale poli diila a tulim.

¹¹ Alege Naawen popolaŋa a za ka giŋgiŋ diipo meena wuu, wa suinummu wie ŋaai ate wa yaali wa nye la a boro ka dila buuri meena po.

¹² Tɛŋ kaai Wen ale Naawen la a ta ka suipeentik, nuru baai ate wa lueri a soa ba a nya la.

¹³ Naawen a kali ka wenŋmazukku a chuiri a nya saalɔ meena.

¹⁴ Wa boka jigini wa nya waai meena ale bo tɛŋzuk de la kama.

¹⁵ Wa waai ale nye jaab meena suinum la, wa seba dii meena ate ti a nye la kama.

¹⁶ Naab a kan cheŋ ga tɔŋ tugurik a dɛ ka wa le ta tugurik tɔŋdɔ pagrisa la nyiŋŋa, kpaliŋ kpaliŋdɔ a kan nyini vum nyiŋ ka wadek pagrim nyiŋŋa.

¹⁷ Wusum ate ba ta cheŋ a ga nye kpaliŋsa la an baga vari nuru a basi, bu le bu pagrimu meena bu ka seeli a vari nuru a basi.

¹⁸ Alege Naawen nimbieŋa a nya baai ale a chali wa yɔgsum la kama, wa a nya baai meena ale bo wa ŋmanteka po la kama,

¹⁹ ayen wa yeeri ba kum po a ta nyini abe wa a te ba ŋandiinta kɔm wen.

²⁰ Ti a limisi Naawen ale yiila. Wa ka ti maarɔ ale ti ligrɔ.

²¹ Ti suiniima a peenti kama, dii nyiŋla, ti ta sebchakka ale wa tuilum yuenni.

²² Fi ŋmanteka a kasim bo ale ti, tidek Naawen yaa, ase ti le diem pai ti yiila a nyo fi po la.