Yiila 31 - WEN GBAŊKA

¹ Ka fi po, Naawen yaa, ate m suk m dek, kan te chivie a yik mu. Pa fi wayɔrisimaŋa a vari mu a basi.

² Te fi tunni a wom mu, nye nwuli jam vari mu a basi. Chim piuŋ a lik mu, chim ase kpaliŋ yeri dii ale pagra la a vari mu a basi.

³ Ase fi ale ka m piuŋ ale m ligrɔ la, be dɛ m niŋ abe fi a sak mu, fi yuenni nyiŋ.

⁴ Gaari mu baruk kuui ate ba pai bari mu la po a basi, dii nyiŋla ka fi ale m ligrɔ.

⁵ M pai m chiika a nyo fi nisima po. Da tuesi mu, Naawen yaa, wensie Wen yaa.

⁶ M kisi baai ale kpari maŋ bɔgta la kama, mi ta sebchakka ale Naawen.

⁷ Fi ŋmanteka ale nye ate m ta popeentik, dii nyiŋla fi nya m ninammu ale seba m wadaanimaŋa.

⁸ Fi an pai mu a te dachiaka alege fi pai mu a zaani ka peelim buui ale nye nna jalɔ la po.

⁹ Naawen yaa, ta jiirim ale mu ale ku pagra kama a te mu. M ninaŋa a jiak kama ale kumsa. M chiika ale m nyiŋka mɛ a jiak kama.

¹⁰ M boka po m jiak kama ale wadaanima ate m benaŋa mɛ a jiak ale ŋuuniŋ. Ate m pagrimu a nueri m ninammu nyiŋ, ate m kobaŋa a yaa wobsa.

¹¹ M dachaasaŋa meena nyiŋ, m le moata baai la nya mu ase ka nuru biok la. M chim ka yɔgsum a te m doaba baai a nyiem ale a nya mu peelim la a chali kama ayen ba nyini vum nyiŋ.

¹² Ba baŋ m wie kama ase m kpi la. Ase m chim ka takabi la.

¹³ Dii nyiŋla mi a wom nuruba yegayega a waasi a weeni ayen yɔgsum a bo jigi meena. Ba siak teŋteŋŋa ale chaab a poli ayen ba ko mu.

¹⁴ Alege mi ta sebchakka ale fi Naawen yaa. M weeni ayen, <>

¹⁵ Diipo meena m bo fi nisima po. Vari mu m dachaasaŋa nisima po a basi vari mu baai ale a vi mu la nisima po a basi.

¹⁶ Te fi nina a nya fi tomteerɔwa zuk. Pa fi ŋmanteka a vari mu a basi.

¹⁷ Naawen yaa, m le kum a te fu la, kan te chivie yik mu. Alege basi ate biem nyama jo chivie po, basi ate ba gu ba.

¹⁸ Basi ate ba nɔngbanvaa tii ale a velim la a nye chorr. Dii nyiŋla ba pai ka kanjanta ale chivie a biisi wayɔrisima nuruma a kaasi.

¹⁹ Fi wamaŋsaŋa a zuak ya, ate fi pai dueni a limisi baai ale a chali fu la. Waai meena a nya wamaŋsaŋa de ate fi pai dueni ayen fi pai te baai ate fi lik ta la kama.

²⁰ Fi pai ba a pobi ta ka fidek yɔgsummu po. Fi pobi ba a ta kama ate nuru baataŋa popolaŋa ale giŋgeluŋtaŋa an baga ba wari a nye.

²¹ Pak Naawen, dii nyiŋla wa sak mu wa ŋmanteka ase m dachaasaŋa ale gilim mu la.

²² M yɔgsummu po m weeni ayen, <> Alege fi wom m le kum a weeni ayen fi ta jiirim ale mu la, m le wi fu ayen fi maari mu la.

²³ Nama baai ale ka Wen nuruba la, ni yaali Naawen! Naawen a nya baai ale ta siaka ale wa la zuk kama, alege kanjanta nyama wa a waali ba ka nalimnyiini.

²⁴ Nama baai ale ta yiila Naawen po la, ni pagra abe ni ta nyiŋbiiri.