Yiila 28 - WEN GBAŊKA

¹ Naawen m piuŋŋoa, mi a wi fu. Kan lik fi tueŋa. Fi dan sina ale an tulisi mu, mi le chim ase ka baai ale kpi la.

² Wom m kumsaŋa ate m kum a yaali ayen fi chali m jiirim la, ase m le kum a yaali maarika la, ase m le zak m nisa wen a tuk fi dɔkku a puusi a te fu la.

³ Kan kaasi mu ale nuru baataŋa, kan kaasi mu ale baai ale a tom biem la, kan kaasi mu ale baai ale a biisi nalimnyiini ale ba sɔm ba nɔi po alege ba suiniima a sueri ale chaab kisika.

⁴ Waali ba, ba tuimbaataŋa nyiŋ. Waali ba ale ba le tom a kaasi la. Waali ba ale ba le pai ba nisima a tom tuim baa tii la abe fi basi ate ba popolaŋa ale a yaali biem buui la a cheem ji badek.

⁵ Ase ba niŋ ale poom kan bo ale Naawen ale a tom diila ale wa le pai nisa a nye diila, wa le waali ba abe wa kaasi ba, wa be kan ŋman zak ba zaani diipo diipo.

⁶ Pimpauk abe bo Naawen jigi, dii nyiŋla wa wom m le kum a yaali jiirim la.

⁷ Naawen ale m pagrim ale ligrɔ. M ta sebchakka m suinummu po ale wa, ate wa yaa maari mu. Masim a bo m suinum po ate m le lenni yiila a te wa jiam.

⁸ Ka Naawen ale wa nuruma pagrɔ, wa le kpaliŋ a te waai ate wa lueri la ale ŋman chim wa varibasidɔ.

⁹ Vari fi nuruma a basi abe fi niak ŋan baai ate fi soa la. Chim ba naapeerik a kasi ba taam wuu.