Yiila 27 - WEN GBAŊKA

¹ Naawen ka m bolim ale m varibasidɔ, mi a chali yɔgsum ale ka wana? Naawen ale m nyuvunni ligrɔ, mi le chali yɔgsum ale ka wana?

² Nuru baata a dan poom a tɔŋ tugurik ale mu, a poli ayen ba kaasi m nyiŋ lammu, m dachaasaŋa ale m kisidɔma a dan poom siti mu, ba le sati a lɔ.

³ Tugurik tɔŋdɔba a dan poom gu dua a limisi mu m suinummu nna a kan chali yɔgsummoa. Tugurik a dan poom yiti m zuk diipo mi le ta sebchakka.

⁴ Jayeŋ dekki ate mi a bek Naawen ayen wa nye a te mu, m le a gisi diila ale nna. Ayen m bo Naawen yenni po m nyuvunni daaŋa meena po, a poli Naawen nalimu wie abe mi a gisi wa wa yenni po.

⁵ Da tuasaŋa po wa le lik mu a tanla wa yenni po. Wa le pai mu a suk wa viuku po abe wa pai mu a zaani piuŋ kuui ale bo wenwen la zuk.

⁶ Ate m yaa nya yuei m dachaasaŋa ale gilimmu la zuk. Wa viuku po ate mi ale nye kaabka ale masim nuemka. Mi le lenni yiila a te Naawen.

⁷ Naawen yaa, wom m lueluku ase m nin wi fu. Ta jiirim ale mu abe fi tulisi mu.

⁸ M suinummu a weeni fi wie ayen, <> Fi nimbidiaka, Naawen yaa, ate mi le gisi.

⁹ Kan suk fidek ale mu, kan pai suipuurum a zɛri fi tomteerɔwa. Fi ale kasim chim m maarɔ. Kan zɛri mu yaase fi banti mu a basi. M varibasidɔ Wen yaa!

¹⁰ Ase m kowa ale m mawa a dan poom banti mu, Naawen ale tuesi mu.

¹¹ Naawen yaa, sak mu fi suiku. De m niŋ a sak mu suyɔrɔsuŋku, m namsidɔma ale a limisi mu la nyiŋ.

¹² Kan pai mu a te m kisidɔma yiilaŋa ale a yaali diila, ale ka velimvendisa ale vaari yiti a potim m nyiŋ ale kasim a zɔk m kaasika.

¹³ M seba chak ale nya kude kama, mi le nya Naawen wanalisaŋa ŋanvuta tɛŋka po.

¹⁴ Limisi Naawen. Be pagra abe fi basi ate fi suinum a kali abe fi limisi Naawen.