Yiila 26 - WEN GBAŊKA

¹ Naawen yaa, biisi a te mu ale mi an tom wari kaasi ya m boka po. M ta sebchakka Naawen kama ate chichama a ka ku po.

² Magsi mu a nya Naawen yaa, gisi mu a nya abe fi gisi m suinum ale m popolaŋa a nya mɛ.

³ Ale fi ŋmanteka a kasim bo ale mu kama, ate mi a cheŋ diipo meena wuu ale fi wensieŋa.

⁴ M kan kali ale nuru baai ale chim pimpaasirɔba la, m ka wari a nye ale venta nyama.

⁵ M kan nya chaab ale nuru baai ale a tom tuim kaasima la. M be a zɛri nuru baataŋa suŋsuŋ kalik kama.

⁶ M nari nisima kama a sak ayen m zɛ wari nɔi po, ate m baga a jam fi juka kuŋkuŋku niŋ, Naawen yaa,

⁷ ale lenni yiila a pak fu abe m weeni fi tuim kperisaŋa meena wie.

⁸ Naawen yaa, mi a yaali fi yenni ate fi boro la, jigi dii ate fi zulaŋa a boro la.

⁹ Kan maa kaasi m chiika ale wabaata nyama, kan kaasi m nyuvunni ale baai ale a yaali ziim nyaka la,

¹⁰ kan kaasi mu ale baai ale kasim a tom tuim kaasima la, ale baai ale kasim zuli nisa a kala a yaali ayen ba da ba la.

¹¹ Alege mi boka po a ka dauŋŋoa. Be da tuesi mu a basi abe fi ta jiirim ale mu.

¹² M naŋtaataŋa a za ka zaana dek jigi. Nuru boanni po, m le pak Naawen.