Yiila 25 - WEN GBAŊKA

¹ Naawen yaa, m pai m chiika a te ka fi.

² Wen yaa, m ta sebchakka ale ka fi. Kan te chivie a yik mu, be kan basi mɛ ate m dachaasaŋa a nya nakdeka m zuwa.

³ Nuru waai ale ta yiila ale fu la a kan jo chivie po, alege baai ale a zɛri fi nɔi kinla nyiŋla a jo ka chivie po.

⁴ Dak fi suitaŋa a sak mu, Naawen yaa, sak mu fi suitaŋa.

⁵ Wen m varibasidɔ, sak mu ate m va fi wensieŋa, ale m yiila a bo fi po danni ale wɔŋa a soa dii meena la.

⁶ Naawen yaa, teeri fi jiirimu ale fi ŋmanteka ale zuak diila, ale fi ta ba nyini ka dipo.

⁷ Kan teeri m bimbanni po wabaataŋa ale m tukpanni suitaŋa. Fi ŋmanteka nyiŋ, teeri mu ale fi ka Naawen maŋ.

⁸ Naawen ka wamaŋsa ale wayɔrisima nyɔnɔ. Dila nyiŋla, wa sak wabaata nyam ka wadek suitaŋa ayen ba nya.

⁹ Wa pai dii ale nala la a sak baai ale a zaab badek la wa niŋ ale a sak ba wa suiku.

¹⁰ Naawen suitaŋa meena ka ŋmanteka ale wensie a te baai ale ta wa nɔiyeŋka wieŋa la.

¹¹ Naawen yaa, fi yuenni nyiŋ, vɔŋ m biemu a te mu, bu dan poom zuak dii ya.

¹² Ka wana ale a nye ase nuru waai ale a chali Naawen la? Wa ale sak ba wa suik kuui po ate wa lueri a te ba la.

¹³ Wa le jigsi wa nyuvunni daaŋa po abe wa ŋaaŋbisa a jam soa wa tɛŋka zuk a nya.

¹⁴ Naawen a dɛ doata ale ka baai ale a chali wa la, ale basi ate ba seba wa nɔiyeŋka.

¹⁵ Mi nina a kasim tusi ka Naawen nyiŋ, dii nyiŋla, ka wa nyiini ale a gaari baruku m dachaasaŋa po a basi.

¹⁶ Cheem nya mu abe fi ta jiirim ale mu, ale m ka m dek nyiini a boro a nam.

¹⁷ M suinummu wadaanimaŋa a yaa piisi kama. Be yeeri mu m ninammu po a basi.

¹⁸ Poli m ninammu wie abe fi vɔŋ m wabaataŋa meena a te mu.

¹⁹ Nya m dachaasaŋa ale piisi diila abe fi nya ba le kisi mu nna bakki la.

²⁰ Lik mu abe fi vari mu a basi. Kan te suik ate ba nyo mu chivie po, ale m chali a suk ka fi po.

²¹ M wamaŋsaŋa ale m wensieŋa abe lik mu, dii nyiŋla m yiila a bo ka fi po.

²² Izirali bisaŋa ale a tu wari dɔbri ŋaai meena la, Wen yaa, da tuesi ba ŋa po a basi.