Yiila 24 - WEN GBAŊKA

¹ Naawen ale soa tɛŋka ale ka jaab meena. Wa abe le ŋman soa tɛŋka ale waai meena ale bo ka po la.

² Naawen le nye tɛŋka ale nyubi ka nyubini a yaa sɛ ka a zaani nyaataŋa zuk.

³ Ka wana ale wa jueli Naawen guuku zuwa? Ka wana ale wa zaani wa tuilum jigini?

⁴ Ka waai nisima ale kan ta daŋta ate wa suinum mɛ a nala la, ka waai ale kan a kaab bɔgta yaase waai ale kan a pɛ ŋmoruk venta wie nyiŋŋa.

⁵ Wa le tuesi niaka Naawen jigi, ate Wen dii ale ka wa varibasidɔwa la ale bɔ te wa.

⁶ Ku be le chim ka dila ale gaŋsa meena ale a gisi wa la, ku le chim ka dila a te waai ale a gisi Jekob Wenni nimbidiak la.

⁷ Ni lak nansuiŋtaŋa, ni lak tuataŋa ate zula Naawa a taam jɔ.

⁸ Ka wana ale zula Naawa de? Ka Naawen dii ale zuak ale pagra la. Naawen dii ale pagra kpaliŋka po la.

⁹ Ni lak nansuiŋtaŋa, ni lak tuataŋa ate zula Naawa a taam jɔ.

¹⁰ Ka wana ale zula Naawa de? Ka Naawen dii ale a de Tugurik Tɔŋdɔba Niŋ la, wala ale zula Naawa.