Yiila 22 - WEN GBAŊKA

¹ Mi Wen yaa, mi Wen yaa, ka boa ate fi zɛri mu? Ka boa ate fi yalima a kan vari mu a basi? Ka boa ate fi yalima ale m ŋuunika?

² Mi Wen yaa, daa meena mi a kum, alege fi kan tulisi mu. Mi a kum yok mɛ alege m kan nya vuusummoa.

³ Alege ka fi ale kala naam zaŋgɔŋka zuk a chim Naawen weleŋka. Ka fi ate Izirali bisaŋa a pak.

⁴ Ti koma a pai ba sebchakka a nyo fi po. Ba ta sebchakka ale fu ate fi vari ba a basi.

⁵ Ba kum te fu a yaa nya varibasika. Ba ta sebchakka ale fu ate chivie an paari ba.

⁶ Alege mi ka jaab kama m daa nuru biiga, ate nuruba a zɛri mu ale kan chiini mu a gum nuruba po.

⁷ Waai meena a dan ga nya mu, kula nyɔnɔwa a nye mu a la kama, ba nyiem girinti ka zuima a weeni ayen,

⁸ <>

⁹ Ka fi abe le soa ate ba biak mu sɔŋsɔŋŋoa. Fi ale te ate m ta siaka ale fu m le ka buluek la.

¹⁰ Din nyini m biam po m pai m dek a te ka fi. Din nyini m le diem bo m mawa ponni po la, ka fi ale m Wen.

¹¹ Kan yalima ale mu, ale wadaanima a moata ate waai karo a maari.

¹² Dachaasa yegayega ale gilim mu ase lalisa la. Dachiak pagrisa ale gilim mu ase Basan tɛŋka lalik pagrisaŋa la.

¹³ Ba lak ba noaŋa ase ka gbeŋma ale nya ŋa ŋandiinta a boro a dɛ diila.

¹⁴ M jiak kama ale ka pagrimoa a yaa waaŋ ase nyiam la, ate m kobaŋa a pagri ŋa tomaŋa po. M suinummu a nyaliŋ kama ase kpaam la.

¹⁵ M pagrimu a kpeeri ka meena ate m giŋgeluŋku a yiti maŋ m laŋtika. Fi pai mu gu kum tantaŋa po.

¹⁶ Nuru baai ale a nye ase baasa la ale gilim mu, nuru baata bimbauŋ ale kɔk gilim mu, ba vuri m nisima ale m naŋtaata.

¹⁷ M baga a chiini m kobaŋa meena, nuru baai ale chim m dachaasaŋa la a gbeeri nina a dueni tɛŋ a nya mu ate ba sue a peenti ale m ninammu.

¹⁸ Ba pai m gattaŋa a chari chaab, ate m gattaŋa nyiŋ ba nak gbaŋ.

¹⁹ Alege Naawen yaa, kan yalima ale mu. M pagrɔ, jam nwuli a maari mu.

²⁰ Kan basi ate ba che mu ale gebik a ko, vari m nyuvunni baasa pagrim po a basi.

²¹ Vari mu gbeŋmaŋa nɔi po a basi. Vari mu goa lalikka nyiilaŋa po a basi.

²² Mi le wi fi yuenni a sak m suataŋa. Nuru boanni po m le pak fu.

²³ Nama baai ale a chali Naawen la, ni pak wa! Nama Jekob bisaŋa meena, ni zuli wa! Nama Izirali bisaŋa, ni zuli wa!

²⁴ Wa an pai ŋaaŋ te waai ale a nam la yaase wa zɛri waai ale a yaali wa maarika la. Alege wa tulisi wa kama ase wa le wi wa a yaali maarika ka la.

²⁵ Nuru boanni ale tigsi za la po ate mi le pak fu. M le zaani ka baai ale a chali fu la niŋ a nye m le puulim diila.

²⁶ Ŋanjaksaŋa ale dɛ kama a chak. Baai ale a gisi Naawen la ale pak wa. Naawen be basi ate ba suiniimaŋa a boro taam wuu.

²⁷ Tɛŋsa meena ale teeri Naawen wie a yaa tulim jam wa jigi, ate tɛŋsaŋa dem meena ale zuli Naawen,

²⁸ dii nyiŋla, naam meena ka Naawen ale soa. Wa ale soa jiga meena zuk a nya.

²⁹ Tɛŋka jigsirɔma meena ale dɛ abe ba puusi fu. Kpilima meena ale kpi duna wa niŋ, baai ale kan baga a vuuk la, ale kpi duna wa niŋ.

³⁰ Biik sii ate ba diem za ba biak la ale tom a te wa. Biik sii ate ba diem za ba biak la, ale wom Nyɔnɔwa wie.

³¹ Ba le mooli wa wayɔrisimaŋa wie a sak biik sii ate ba an diem biak la, dii nyiŋla, wa le nye dila.