Yiila 21 - WEN GBAŊKA

¹ Naawen yaa, naawa a ta popeentik ale fi pagrimu. Wa sui peenti ale fi le te wa pagrim ate wa a nak wa dachaasaŋa dɛ la.

² Fi te wa wa suinummu ale a yaali diila, fi be an zɛri wa le lak wa nɔnni a bek fu diila.

³ Fi pai niak kpieŋ a te wa tia, a pai ligmɔniŋ zutɔk a vuk wa zukku.

⁴ Wa bek fu ayen fi te wa nyuvuri, ate fi pai nyuvuri woŋ a te wa taam wuu.

⁵ Fi le te wa nakdeka wa dachaasaŋa zuk la a basi kama ate wa yuenni a nya zula yegayega. Fi te wa nyaksika ale zuaka.

⁶ Wensie fi te wa niaka taam wuu ale ŋman nye ate wa ta popeentik ale fidek masimu.

⁷ Naawa a ta sebchakka ale Naawen kama, Wen Dii Ale Bo Wenŋmazuk La ŋmanteka nyiŋ, naawa a kan choa.

⁸ Fi nisima ale yik fi dachaasaŋa meena. Fi juga nisimaŋa ale yik fi kisidɔma.

⁹ Fi le kaasi ba ale bolim ŋiak. Naawen le nɛ ba ale suipuurum, ate fi bolimu a dɛ ba.

¹⁰ Fi le kaasi ba ŋaaŋbisa tɛŋka de zuk, fi le kaasi ba buuni po ate ba kan maa bo saalɔba po.

¹¹ Ba dan poom a poli ayen ba nye fu biem, ba dan poom a poli ninmiisima wie ayen ba nye fu, ba an baga a nye wari ya.

¹² Dii nyiŋla fi le gbeeri fi tommu a basi ba zuk ate ba pilim tulim ba ŋaaŋ.

¹³ Naawen yaa, fi yuenni a nya zak zaanika a nyini ka fi pagrimu po, ti le lenni yiila abe ti pak fi pagrimu.