Yiila 19 - WEN GBAŊKA

¹ Wenŋmazukku a biisi lagri Wen zulaŋa ale ka diila kama. Wenzukku a weeni wa nisaŋa ale tom diila kama.

² Dai ale pa te dai meena a weeni ka Naawen nyeelaŋa. Ate yɔktaŋa meena mɛ a weeni wa sebilaŋa.

³ Biik karo ate fi kan wom ba lueluta.

⁴ Ba luelutaŋa a cheŋ ka nna ŋmɔŋ a paari tɛŋka meena, ba wieŋa a cheŋ a paari tɛŋka kpeglimka. Wa ti kusuŋ a te wenbinni wenzuk po,

⁵ ate di pusi a nyini ase nipok fiak nyɔnɔ ale nyini wa yeri po a nyini la. Ase chalidɔ ale za a naŋ ale gomsi magsi chali dɛka la.

⁶ Di pusi nyini konni a taam a siŋ yeniŋka. Jaab karo a suk wadek ale wenbinni nakka.

⁷ Naawen sinsaŋŋa a welema kama, ŋa a te chiika pagrim. Naawen kaamka a ta maarika kama. Ka pai yam a te baai ale jɔk bu la.

⁸ Naawen wieŋa a nala kama, ŋa pai masim a nyo suinum po. Naawen wieŋa ka wensie ŋa a te popola maŋsa.

⁹ Fi dan a chali Naawen yɔgsum ku ka wamaŋ, dila ale kasim boro kama. Naawen a bo ka wensie buusa ŋa ka daŋta.

¹⁰ Wa buusaŋa boka a nala a gaam ligmɔniŋ kama, ŋa masa a gaam siita, si tii ale nyini samparima po la.

¹¹ Ŋa a kaam fi tuimtomdɔwa. Waai ale va ŋa la a tuesi ka tiirim kpioŋ.

¹² Ka wana ale baga a seba wadek wakaasima? Vɔŋ m nyebeka a te mu.

¹³ Maari mu ate m kan a tom m dek yaalika tuim kaasima. Kan basi ate wakaasima a chim m naaba. Ate m yaa welema, m kan seba kaasuŋ kpioŋ nɔi po.

¹⁴ Wari dii meena ale nyini m nɔi po a nyini la, abe popoli ŋaai meena ale nyini m suinummu po a nyini la, fi sui peenti ale ŋa. Naawen yaa, fi ka m Piuŋ ale m Da Tuesirɔ.