Yiila 18 - WEN GBAŊKA

¹ Naawen, m pagrɔ, mi a yaali fu.

² Naawen ka m piuŋ ale m ligrɔ ale m varibasidɔ. Mi Wenni ka m piuŋ, wa jigi ate mi a suk, mi jachɔgsim ale m varibasika nyiili, wa ka mi ligrɔ.

³ Mi wi Naawen dii ale magsi pimpauk la, ate mi nya varibasika mi dachaasa jigi,

⁴ Kum a jam gilim mu kama, kaasuŋ wuurik ale nya pagrim mi zuk.

⁵ Kpiluŋ miisa ale melim a gilim mi, kum baruk ale jam mi jigi.

⁶ Mi daanika po mi wi Naawen kama. Mi kaari wi m Wenni ayen wa maari mu. Wa yenni po wa wom m lueluku. Mi kumsaŋa a jo wa tue po kama.

⁷ Tɛŋka a choa kama ale kum, guutaŋa nyubaŋa a kpiŋsi. Ba gɔk kama dii nyiŋla wa sui ale jam puuri.

⁸ Nyuisa nyini wa nyueŋa po a nyini. Bolim buui ale a dɛ la jam nyini wa nɔnni po a nyini, bolim kaala mɛ a jam toati bolim ŋiak a nyini du.

⁹ Wa vuri wenzukku a nyini du a siŋ tɛŋ. Ate chiŋma sobta jam bo wa naŋtaata po.

¹⁰ Wa dɔ javuk a yiri cheŋ. Wa jam ka nna nwuli vioku kinkaŋŋa zuk.

¹¹ Wa basi ate legi a lik wa. Chiŋma sobta ale nyiam a gilim wa.

¹² Tana ale bolim a nyini ŋmorukku ale a nyaksi la a dɛ wa niŋ a luenti chiŋma sobtaŋa a te wa.

¹³ Naawen a bo wenŋmazuk po a na ase nanpansa la. Wen Dii Ale Bo Wenŋmazuk La lueluku a biisi ate ŋmoruk tana ale bolim kaala a siŋ.

¹⁴ Wa tɔŋ wa peemaŋa ate ŋa kati wa dachaasaŋa a waaŋ. Wa le nyaksi ase ŋmoruk la a yeeri ba.

¹⁵ Naawen yaa, fi toariŋ ale vuusi ale fi nyueŋa a nyati nyakpiemu vaasaŋa, ate tɛŋka nyubaŋa a dua jassi.

¹⁶ Wa nyini ka wenŋmazuk a yik mu a liiri mu nyaliuŋku po.

¹⁷ Wa vari mu m dachiak pagrisaŋa nisima po a basi, wa vari mu baai ale kisi mu la nisima po a basi, ba le pagra a gaam mu la nyiŋ.

¹⁸ Diipo ate m bo daanika po la ba jam a yaali kpaliŋ ale mu, alege Naawen a maari mu.

¹⁹ Wa ta mu a nyini a zaani peelim kpioŋ po. Wa vari mu a basi dii nyiŋla wa sui yɔk ale mu kama.

²⁰ Naawen a tuni mu a magsi chaab ale ka m wayɔrisimaŋa, wa tuni mu a magsi chaab ale ka m nisima ale kan ta daŋta la nyiŋ.

²¹ Dii nyiŋla m va Naawen suiku kama, mi an nye wabiowa, m be an nyini mi Wenni ŋaaŋ ŋmani ya.

²² Wa buusaŋa meena a doa ka mi niŋ. M be an zɛri wa ŋmarisika.

²³ Mi ka kaasuŋ yaase wari wa niŋŋa ale yik m dek a ta nyini biem po.

²⁴ Naawen a tuni mu a magsi chaab ale m wayɔrisimaŋa, wa tuni mu a magsi chaab ale ka m nisima ale kan ta daŋta la nyiŋ.

²⁵ Wensie nyama fi sak wensie ale ba kama, baai ale kan ta kaasuŋ la fi sak ayen fi ka kaasuŋŋoa.

²⁶ Baai ale nye a magsi la, fi sak ba ayen fi mɛ nye a magsi kama, alege nuru baai nyeka ale tua la fi kan dɛ doata ale ba.

²⁷ Baai ale a zaab badek la fi vari ba a basi alege pai kanjanta nyama a nyo chivie po.

²⁸ Fi basi ate m bolimu a kasim tɔti za a dɛ, Naawen dii ale ka mi Wen la a tulim m legini ate di chim bolim.

²⁹ Fi te mu pagrim ate m baga a tusi tugurik tɔŋdɔba ate ba a cheŋ, mi Wenni nyiŋ m baga a yɔk a gaam parik a zi.

³⁰ Dan ka Wen tɔga, wa suiku ka chekki, Naawen wanni a ka nyebeka. Wa ka jachɔgsim a te baai meena ale a suk wa jigi la.

³¹ Ka wana ale Wen alege daa Naawen ya? Ka wana be le Piuŋku, ka ti Wenni nyiini?

³² Ka Wen ale te mu pagrim ale basi ate m suiku a nye chekki.

³³ Wa nye ate m naŋtaataŋa a pagra ase kab naŋtaata la. Wa maari mu ate m baga a zaani guuta zuima.

³⁴ Wa zamsi mu kpaliŋ nyeka, wa te mu pagrim ate m baga a tɔŋ kutuk mɔnuŋ tom.

³⁵ Fi pai fi varibasika jaligimmu a te mu, fi juga nisaŋa ale vari mu basi, fi koori ka tɛŋ ayen fi nye ate mi a zuak.

³⁶ Fi basi ate suik kuui ale bo mi naŋsa tɛŋ la a labsa, ate mi kan sati a lɔ.

³⁷ M vi m dachaasaŋa a yik ba kama. Mi an pai ba a basi ya, m kaasi ba meena kama.

³⁸ M nak ba kama a lɔnsi ate ba an baga a yiti ŋmai ya. Ba lɔ dua ka m naŋtaata po.

³⁹ Fi te mu pagrim a magsi kpaliŋka nyeka, fi basi ate m dachaasaŋa a siak te mu.

⁴⁰ Fi te m dachaasaŋa a cheem ba ŋaaŋ a yiti chali, m kaasi baai ale kisi mu la.

⁴¹ Ba kaari a yaali maarika alege waai karo a vari ba a basi. Ba kaari ayen Naawen a maari ba alege wa an tulisi ba.

⁴² M nak ba kama a bugsi ase nyuŋ ate viok a ji diila. Mi yuk ba a waaŋ ase ka bagta ale doa suitaŋa po diila.

⁴³ Fi vari mu nuru baai ale a yaali ayen ba nye kpaliŋ ale mu la nisima po a basi. Fi nye ate m chim tɛŋsa naab. Nuru baai ate m zɛ la a siak te mu.

⁴⁴ Ba dan ga wom m biik, ba siak a te mu. Nicham a siak a te mu.

⁴⁵ Ba meena a jɔk yiila kama, ba nyini ba jigi pagrisaŋa jigi a jam kama ate ba nyiŋsa a gɔk.

⁴⁶ Naawen a vua kama! Mi a pak m piuŋku! M Varibasika Wenni yuei yiti!

⁴⁷ Wa le Naawen dii ale tuni a te mi, waai ale basi ate mi a nya tɛŋsaŋa zuk,

⁴⁸ waai ale vari mu m dachaasa nisima po a basi. Fi zak mu zaani m dachaasaŋa niŋ, fi vari mu nuru baai nyeka ale tua la jigi a basi.

⁴⁹ Naawen yaa, kude nyiŋ mi le pak fu tɛŋsa suŋsuŋ, m le lenni yiila a pak fi yuenni.

⁵⁰ Wa a te wa naawa nakdeka nna yegayega, wa a sak ŋmanteka ale waai ate wa lueri la, ale Deevid ale ŋaaŋbisaŋa taam wuu.>>