Yiila 17 - WEN GBAŊKA

¹ Naawen yaa, wom m saalim maŋka ŋmasi wom m kaarika. Lak turi wom m puusa, daa venta nɔi puusa.

² Be tuni m pamini m dachaasaŋa jigi a te mu. Be basi ate fi ninaŋa abe nya dii ale nala la.

³ Fi seba m suinum. Fi jam m jigi yok. Fi jigi m suinummu po a nya kama alege fi an nya popoli baata m po. M nye m popola kama ayen m kan biisi biemmoa.

⁴ Nurubisa nyeela jigi, m yik m dek kama a va chaab ale fi nɔi ale weeni diila ayen m kan va wɔkwɔk suita.

⁵ M daam kasim a cheŋ ka fi suiku po, m be an nyini ku po nyini ya.

⁶ Wen m puusi a te fu, ate fi le wom mu. Be basi ate fi tunni a wom m puusa.

⁷ Sak fi ŋmante kperika. Fi vari baai ale suk badek fu po la ba dachaasa nisima po a basi kama ale fi juga nisaŋa.

⁸ Lik mu ase fidek numbiri la, suk mu fi kiŋkaŋŋa yisuŋku po.

⁹ Lik mu ate nuru baai nyeka ale tua la kan kaasi mu. Lik mu ate m dachaasaŋa a kan ko mu.

¹⁰ Ba ka jiirimmoa ale a biisi kanjauŋ.

¹¹ Ba gilim mu ate m ka viriŋka jigi ya, a gisi suik ayen ba dari mu a lɔnsi.

¹² Ba a nye ase ka gbeŋli ate kɔm a ta di ate di a gisi ŋandiinta diila. Ba gu dua kama a limisi ayen ba boani mu munamuna.

¹³ Naawen yaa, vaari yiti a tu chaab ale ba a nak ba a yiak! Pa fi gebika a vari mu nuru baataŋa jigi a basi.

¹⁴ Naawen yaa, pai fi nisaŋa a vari mu nuru bala chaab nisima po a basi, vari mu nuru baai tutuna ale bo ka tɛŋzuk de nyiini la nisima po a basi. Baai ate fi a yaali la fi basi ate ba a chak kama. Ba bisa a ta zuak kama, a tali zaani ba ŋaaŋbisa mɛ.

¹⁵ M wayɔrisima po m le nya fi nimbidiaka. M dan yiti goom po a nya fi ale ka diila m le chak.