Yiila 148 - WEN GBAŊKA

¹ Pak Naawen. Pak Naawen a nyini wenŋmazuk, pak wa ŋmazuk niŋniŋŋa.

² Pak wa, wa Wen maarɔma meena, pak wa, wa ŋan baai meena ale bo wenŋmazuk la.

³ Pak wa, wenbiri ale chiiga, pak wa, chiŋmari sii meena ale a nyaksi la.

⁴ Pak wa, fi wenŋmazukku niŋniŋŋa ale nya tii ale bo wenzukku la.

⁵ Basi ate ba pak Naawen yuenni, diila wa biisi kama ate ba jam.

⁶ Wa pai ba basi ka ba jiŋŋa taam wuu, wa te ka luelik kaai ale kaa taamu.

⁷ Pak Naawen a nyini tɛŋzuk de, nama nyakpiemu ŋantaŋa ale nyakpientaŋa liuŋtaŋa,

⁸ nyaksika ale viok, ŋmoruk tana ale chiŋma, va pagrisa ale a zuli wa biik,

⁹ nama guuta ale pina, yɔna tiisa ale nyunyoŋta meena,

¹⁰ gɔi duŋsa ale niiga meena, ŋan fiisa ale nuin sii ale a yiri,

¹¹ tɛŋka nalima ale tɛŋsa meena, nama nabisa ale tɛŋka kpaga meena,

¹² nidoa paaluk ale dɔklieba, nidoa kpagsa ale bisa.

¹³ Basi ate ba pak Naawen yuenni, ka wa yuenni nyiini ale a yiti, wa nalimu a yalima gaam tɛŋka ale wenzukku a bo ŋmai.

¹⁴ Wa basi ate wa tɛŋka a pagra kama, ayen wa nuruma a pak wa, Izirali demma, baai ate wa a yaali nna yegayega la. Pak Naawen.