Yiila 147 - WEN GBAŊKA

¹ Pak Naawen. Ku le nala dii ate ti le yi yiila a pak ti Wenni, ku le nala dii ale magsi ayen ti pak wa.

² Naawen ale yik Izirali a zaani, wa le a tigsi Izirali dem baai ate ba yik ta cheŋ la.

³ Wa a tebi baai sue ale kaasi ale a bobi ba mula.

⁴ Wa le seba chiŋmarisaŋa nɔi ale a wi kanyi meena yuei.

⁵ Ti Nyɔnɔwa a zuak kama ale ta pagrim nna yegayega, wa miŋka a ka bain ya.

⁶ Naawen a maari baai ale a yik badek la kama, alege yuk wabaata nyama a lɔnsi tɛŋ.

⁷ Ni yi yiila a te Naawen ale jiam teka, pai kpanuŋku a nak yiila a te Wen.

⁸ Wa lik wenzukku kama ale chiŋma, wa a te tɛŋka ŋmoruk ale nye ate wuuk a chim guuta zuk.

⁹ Wa le a te niiga ŋandiinta, ale tagaaruk bisa ase ti nin wi.

¹⁰ Wa mariŋka a ka le wusum pagrimoa, yaase wa mariŋka a bo ale nurubiik naŋsa,

¹¹ Naawen a mariŋ ka baai ale a chali wa la, baai ale pai ba yiila a basi wa ŋmanteka po la.

¹² Jerusalem, ni zak Naawen yuenni a zaani, Zayon, ni pak ni Wenni,

¹³ diila wa basi kama ate ni nansuiŋtaŋa ku ti biŋŋa a pagra, ale a niak ni nuruma ale bo ale ni la.

¹⁴ Wa basi ate suiyɔgni a bo ni tɛŋ banaŋa alege a te ni ŋanbie maŋsa.

¹⁵ Wa a te wa wieŋa tɛŋka, ate wa wanni a chali nna nwuli.

¹⁶ Wa a pati ŋmoruk tanaŋa a waaŋ ase buntuem la.

¹⁷ Wa basi ate viok a jam ase ziŋa la, waai a kan baga a tu chaab ale ŋootaŋa ate wa tom la.

¹⁸ Wa tom wa wanni ate di nyaliŋ ba, wa dam wa maglimu, ate nyaataŋa a chali.

¹⁹ Wa pai wa wanni a sak Jekob, wa ŋmarisika ale wa buusaŋa a te Izirali.

²⁰ Wa an nye nna a te tɛŋ yoŋŋoa, ba zɛ wa buusaŋa Pak Naawen.