Yiila 146 - WEN GBAŊKA

¹ Pak Naawen. M chiiga, pak Naawen.

² Mi ale pak Naawen m boka po meena, m le yi yiila a pak m Wenni, m le tɔlim boro la.

³ Kan pai fi sebchakka a basi nabisa zuwa, nurubiik zuwa, waai ale kan baga a vari a basi.

⁴ Ba chiisaŋa a dan basi ba, ba a ŋmani a cheŋ ka tɛŋka, dai dila danni dek ba zɔŋŋa ka kinla.

⁵ Suipeentik a bo le ka waai maarɔ ale chim Jekob Wenni la, waai yiila ale bo le Naawen, wa Wenni la,

⁶ waai ale wenzuk ale tɛŋ, ale nyakpiemu, ale jaab meena ale bo ba po la Nyeerɔ, Naawen dii ale ta wensie taam wuu la.

⁷ Wa bo a te baai ate ba a namsi la kama, ale a te kɔm ale ta baai la ŋandiinta. Naawen a vari ligrɔba a basi kama.

⁸ Naawen a te yeeba nyaasim. Naawen a zak baai ale lo la a zaani. Naawen a yaali wayɔrisima nyama.

⁹ Naawen a nya nichamma zuk ale a maari kpiŋsa ale pukɔga, alege a kaasi wabaata nyama suita.

¹⁰ Naawen a dɛ wa naamu kama taam wuu, nama Wenni, Zayon po a te gaŋsa meena a cheŋ. Pak Naawen.