Yiila 145 - WEN GBAŊKA

¹ M Wenni yaa, waai ale ka naab la, m le zak fu a zaani. M le pak fi yuenni taam wuu.

² Daa meena mi le pak fu abe m zak fu yuenni a zaani taam wuu.

³ Naawen a zuak ka yega, ale magsi pimpauk, wa le zuak diila nuru an baga a miŋi.

⁴ Gaŋ kanyi ale pak fi tuima a te ka choa, ba le weeni fi tuim kpiema a sak.

⁵ Ba le weeni fi naamu zulaŋa ale nalimu mɛ, be poli fi wakinkagla tuimaŋa zuk.

⁶ Ba le biisi fi tuim kpiema wari ate m mooli fi tuim kpiemaŋa a te.

⁷ Ba le dɛ fi wamaŋsaŋa yegayega tigi, abe ba yi fi wayɔrisimaŋa yiila ale suipeentik.

⁸ Naawen ka niarɔ ale ta jiirim, wa sui kan kpabi a puuri ale jigsi ale ŋmanteka.

⁹ Naawen a nala kama a te waai meena, wa ta jiirim kama ale waai meena ate wa nye la.

¹⁰ Naawen yaa, baai meena ate fi nye la ale pak fu, fi bisaŋa ale zak fi yuenni a zaani.

¹¹ Ba le weeni fi naamu zulaŋa abe ba biisi fi pagrimu wie,

¹² ate waai meena a seba fi pagrim tuimaŋa ale fi naamu zulaŋa nalimu.

¹³ Fi naamu ka naam buui ale boro wuu, fi pagrimu abe boro ka dila a cheŋ gaŋsa meena po. Naawen a ta wensie kama ale wa pumpuulimaŋa meena, ale a yaali baai meena ate wa nye la.

¹⁴ Naawen a yik baai meena ale a lo la kama ale a zak baai meena ale koori tɛŋ la a zaani.

¹⁵ Waai meena nina a nya ka fi jigi, ate fi a te ba ŋandiinta diipo ale magsi la.

¹⁶ Fi lak fi nisa kama a basi ate javuk meena a chak.

¹⁷ Naawen ka wayɔrisima nyɔnɔ suita meena po ale a yaali baai meena ate wa nye la.

¹⁸ Naawen a moata baai meena ale a wi wa la kama, baai meena ale a wi wa ale wensie la.

¹⁹ Baai meena ale a chali wa la, wa a nye ba le a yaali diila kama, wa a wom ba kumsa kama ale a vari ba a basi.

²⁰ Naawen a limisi baai meena ale a yaali wa la kama, alege wabaata nyama wa le kaasi ba meena.

²¹ Mi nɔnni ale biisi a pak Naawen. Basi ate jaab meena Naawen nye la a pak wa tuilum yuenni taam wuu.