Yiila 144 - WEN GBAŊKA

¹ Pak Naawen, mi Piuŋku. Wa a sak mu kama a magsi kpaliŋ ale a gomsi mu a magsi tugurik.

² Wa ka m ŋmanteerɔ ale m ligrɔ, m puŋ ale m varibasidɔ, m jakasim, waai ate mi a suk wa jigi la. Wa ta pagrim kama nuru baai zuk ate mi a nya la.

³ Naawen yaa, nurubiik ka boa, ate fi niŋ a bo wa po, nuru mɛ, ate fi niŋ a bo wa po?

⁴ Wa a nye ase ka vuusum la, wa daaŋa a nye ase ka yisuŋ ale a taam la.

⁵ Naawen yaa, lak wenzukku a siŋ tɛŋ, tiri guutaŋa, ate ti kpiiri nyuisa a basi peelim.

⁶ Basi ate bolim nyaksika a jam waaŋ fi dachaasaŋa, tɔŋ fi peemaŋa a basi ate ŋa a cheŋ.

⁷ Nyini wen a paari tɛŋ a dari mu a ta nyin nyaliuŋku po, a vari mu a basi, vari mu nicham pagrim po a basi.

⁸ Baai ale kan maara a weeni wensie alege velim a pɛ.

⁹ M Wen yaa, m le yi yipaali a te fu, m le nak kpanuŋku abe m yi a te fu.

¹⁰ Fi pai pagrim a te nalima ale vari fi tomteerɔwa Deevid a basi.

¹¹ Vari mu m dacha sii nyeka ale tua la a basi, vari mu nicham pagrim po a basi, baai ale kan maara a weeni wensie alege velim a pɛ.

¹² Ti bisaŋa bimbain po ale nye ase ŋanborinta ale chim a pagra la, ti liema ale nye ase ka zaŋŋa la ate ba nye ŋa ayen ŋa basi ate naab yeri a nala la.

¹³ Ti booŋa ale sueri ale ka ŋanta tɔgatɔga. Ti piisaŋa ale piisi a vi tusa, ale tusa piisa ti laŋsaŋa po.

¹⁴ Ti lalik kpaansaŋa ale dari ŋandobra. Parisa se kasika a kan boro, tɛŋ yonsa yik ta cheŋka a kan boro. Daanika kumsa a kan bo ti suitaŋa po.

¹⁵ Suipeentik a bo ka nuru baai jigi ate wieŋa a chim wensie la. Suipeentik a bo ale ka nuru baai Wen ale ka Naawen la jigi.