Yiila 143 - WEN GBAŊKA

¹ Naawen yaa, wom m puusaŋa. Fi wayɔrisimaŋa po wom m saalim ka, tulisi mu fi wensieŋa nyiŋ.

² Kan pai mi fi tomteerɔwa a zaani nyenyaka po, waai karo ayen wa zɛ kaasuŋ nɔi po fi niŋŋa.

³ Mi dachiaka a vi mi kama a nak mi a lɔnsi. Wa pai mi a basi legi po ate mi a boro ase baai ale kpi dipo la.

⁴ Dila la, mi gomsi magsi ka siateka, mi suinummu po ka daanika nyiini.

⁵ Mi a teeri ka dipo daaŋa, mi a poli ka fi tuimaŋa meena zuk alege a poli mɛ fi nisimaŋa ale tom diila.

⁶ Mi zak ka nisima wen a puusi a te fu, ase tɛŋ kosik la nyanyuila ale ta m chiika.

⁷ Naawen yaa, tulisi mu yɔgyɔgla de. Mi jɔk yiila meena kama. Kan suk fidek m jigi ya, dan kan daa di mi le siŋ kpiluŋ.

⁸ Teeri mu saluik meena fi ŋmanteka wari, diila m sebchakka a bo ale ka fi. Mi puusaŋa a jueli ka fi jigi, sak mu suik kuui ate mi ale cheŋ la.

⁹ Naawen yaa, mi a cheŋ ka fi jigi ayen fi lik mu. Vari mu m dachaasaŋa jigi a basi.

¹⁰ Fi ka m Wen, sak mu ate mi a nye fi yaalika. Be nala a te mu, abe fi gani mu suik maŋ po.

¹¹ Naawen yaa, fi yuenni nyiŋ, fi wayɔrisimaŋa po, ta mu a nyini daanika po a nyini.

¹² Fi ŋmanteka ale mu nyiŋ, ko m dachaasaŋa abe fi kaasi baai ale a namsi mu la, diila m ka fi tomteerɔ.