Yiila 135 - WEN GBAŊKA

¹ Pak Naawen. Pak Naawen yuenni, pak wa, nama Naawen tomteerɔma,

² nama baai ale a tom Naawen yenni po la, ti Wenni Yenni dabiaka po la.

³ Pak Naawen, diila Naawen a nala kama, yi yiila a pak wa yuenni, ale ka dila ale nala.

⁴ Naawen a lueri Jekob ayen wadek soa, Izirali a chim wa tuilum jaab ate wa tara.

⁵ Mi seba ayen Naawen a zuak kama, ayen ti Nyɔnɔwa a zuak kama a gaam wena meena.

⁶ Naawen a nye ka dii ale a peenti wa sui la, wenzukku ale tɛŋka, nya kpientaŋa ale ti liuŋtaŋa po.

⁷ Wa basi ate chiŋma a nyini tɛŋka kpeglimka jiga, a basi ate ŋmoruk a jam ale nyaksika ale basi ate vioku a nyini wa ŋanta yeeŋa po.

⁸ Wa ko Ejipiti bi kpaŋŋa a lɔnsi, nidoaba ale duŋsa bi kpaga.

⁹ Ejipiti demma, wa basi ate wa wakperikaliisaŋa ale wakinkaglaŋa a jam ni suŋsuŋ. Wa ta chaab ale Faaro ale wa tomteerɔma.

¹⁰ Wa ko tɛŋsa yegayega a lɔnsi ale ko nalim kpiema.

¹¹ Amori demma naawa Siyon ale Basan naawa Og ale Keenan nalimaŋa meena,

¹² ale pai ba tɛŋka a te ase nitalim la, nitalim a te wa nuruma Izirali demma.

¹³ Fi yuenni, Naawen yaa, a boro ka taam wuu, fi yuenni, Naawen yaa, a va ka gaŋsa po meena.

¹⁴ Naawen ale vari wa nuruma a basi abe wa ta jiirim ale wa tomteerɔma.

¹⁵ Tɛŋsaŋa bɔgtaŋa ka kpana ale ligmɔniŋ, ate nurubisa a pai nisa a nye.

¹⁶ Ba ta nɔi, alege an baga a biisi, nina, alege an baga a nya,

¹⁷ ba ta tue alege an baga a wom, yaase vuusum a bo ba noa po.

¹⁸ Baai ale a nye ti la ale nye ase ka bɔgtaŋa la, ale baai meena ale ta sebchakka ale ti la.

¹⁹ Izirali yeri yaa, pak Naawen. Aaron yeri yaa, pak Naawen.

²⁰ Livai yeri yaa, pak Naawen. Nama baai ale a chali wa la, pak Naawen.

²¹ Pimpauk a nyini Zayon a cheŋ Naawen jigi, waai ale bo Jerusalem la jigi. Pak Naawen.