Yiila 119 - WEN GBAŊKA

¹ Suipeentik a bo baai ale kan ta wakaasuŋ la jigi, baai ale cheŋ a va chaab ale Naawen sinsaŋŋa la.

² Suipeentik a bo baai ale ta wa kaamka la jigi ale a gisi wa ale ba suiniima meena la.

³ Ba kan nye wari a kaasi, ba a cheŋ ka wa suitaŋa po.

⁴ Fi pai ka fi wieŋa a dueni, ŋaai ale magsi ba va ŋa meena la.

⁵ Ku le magsi ayen mi a va wa suitaŋa dii abe m zuli wa ŋmarisika.

⁶ Dila ate m kan jo chivie po ase m nin poli fi wieŋa wie.

⁷ M le pak fu ale suinum weleŋ ase mi ale a zamsi fi buusa maŋsaŋa la.

⁸ M le zuli fi ŋmarisika, kan din bola a zɛri mu.

⁹ Nuru paalik ale nye ka sɛ ate wa boka a welema? Wa nin boro a va chaab ale fi wanni.

¹⁰ Mi a gisi fu ale ka m suinummu meena, kan basi ate m cheŋ bɛ abe m ge fi wieŋa.

¹¹ M pai fi wanni a suk ka m suinum po ayen m kan tom a kaasi fu.

¹² Pimpauk a cheŋ fi jigi, Naawen yaa, sak mu fi ŋmarisika.

¹³ M pai m nɔnni a weeni buusa ŋaai meena ale nyini fi nɔi po a nyini la.

¹⁴ Mi a naŋ kama fi kaamka nyiŋ ase waai ale a naŋ jigsika yegayega nyiŋ diila.

¹⁵ Mi a poli ka fi wieŋa zuk ale a kpesi fi suitaŋa.

¹⁶ Mi a yaali fi ŋmarisika, mi kan zɛri fi wanni.

¹⁷ Nye nalim a te fi tomteerɔwa, ate m boro, m le zuli fi wanni.

¹⁸ Lak m nina ate m nya wakperisa fi sinsaŋŋa po.

¹⁹ M ka nichaanɔ tɛŋzuk de, kan suk fi wieŋa m jigi ya.

²⁰ Fi buusa kɔrisa ale kasim a dɛ m chiika daa meena.

²¹ Toariŋ gaasa nyama, ate ba ka a te ba la ale baai ale nyini fi wieŋa po a nyini la.

²² Yeeri mu laata ale kisika po, diila m ta fi kaamka kama.

²³ Kpaŋŋa a kali kama ale chaab a kaasi mi yuei, fi tomteerɔwa ale poli fi ŋmarisika zuk.

²⁴ Fi kaamka ka m mariŋka, ŋa ka m sagrɔba.

²⁵ Ba dueni mi ka tɛŋ tantaŋa po, lik m nyuvunni a ta va chaab ale fi wanni.

²⁶ Mi weeni m suitaŋa wie kama ate fi tulisi mu, sak mu fi ŋmarisika.

²⁷ Basi ate m miŋ fi wieŋa sakka, ate m yaa poli fi wakinkaglaŋa zuk.

²⁸ M chiika a jiak kama ale suipuurum, basi ate m ta pagrim a va chaab ale fi wanni.

²⁹ Lik mu pimpaasima wie po, ta ŋmanteka ale mu a ta va fi sinsaŋŋa.

³⁰ Mi lueri ka wensie suiku, mi pai m suinummu a basi ka fi buusaŋa jigi.

³¹ Mi yik ka fi kaamka giŋgiŋ, Naawen yaa, kan basi ate ba pai mu a nyo chivie po.

³² Mi chali a va ka fi wieŋa suiku, diila fi vari m suinummu a basi kama.

³³ Sak mu, Naawen yaa, ate m va fi ŋmarisika, ate m ta ka a ga paari kpeglimka.

³⁴ Te mu miŋka, ate m ta fi sinsaŋŋa abe mi a zuli ŋa ale m suinum meena.

³⁵ Dak mu fi wieŋa suiku, dula jigini ate mi a nya suipeentik.

³⁶ Tulim m suinummu a va fi kaamka jigi abe bu kan va butuem nyuenta jigi ya.

³⁷ Te ti m cheem m nina jigi abe m basi ŋan baai ale kan ta kiri ya, lik m nyuvunni a ta va chaab ale fi wanni.

³⁸ Basi ate fi le puulim diila a nye te fi tomteerɔwa, ate wa a chali fu.

³⁹ Yeeri chivieŋa ate mi a yiili ale yɔgsum la, diila fi buusa a nala kama.

⁴⁰ Mi ale a yaali fi wieŋa a soa diila, lik m nyuvunni fi wayɔrisimaŋa po.

⁴¹ Fi ŋmanteka a jam m jigi, Naawen yaa, fi varibasika a jam a va chaab ale fi pumpuulimaŋa.

⁴² Ate mi yaa tulisi waai ale a nye mi a la la, diila m ta sebchakka kama ale fi wanni.

⁴³ Kan chiak wensie wanni m nɔi po, diila m pai m yiila a basi ka fi buusaŋa po.

⁴⁴ M le kasim a zuli fi sinsaŋŋa kama a cheŋ wuu.

⁴⁵ M le kasim a cheŋ ka fasiyaa diila mi gisi nya fi wieŋa kama.

⁴⁶ M le biisi fi kaamka nalima niŋ m be kan jo chivie po.

⁴⁷ Diila m mariŋ fi wieŋa kama mi le a yaali ŋa la nyiŋ.

⁴⁸ Mi zak ka nisa a tuk fi wieŋa nyiŋ, ŋaai ate mi a yaali la. Mi a poli fi ŋmarisika zuk kama.

⁴⁹ Teeri fi wanni ate fi te fi tomteerɔwa la, diila fi te mu ka yiila.

⁵⁰ Mi suiyɔgni m ninammu po ale nna. Fi pumpuulimaŋa a lik m nyuvunni kama.

⁵¹ Gaasa nyama a nye mu a la kama ale kan basi, alege mi kan cheem a basi fi sinsaŋŋa.

⁵² Mi a teeri ka fi dipo buusaŋa, Naawen yaa, m be nya suiyɔgni kama ŋa nyiŋ.

⁵³ Suipuurum ale bobi mi wabaata nyama nyiŋ, baai ale zɛri fi sinsaŋŋa la.

⁵⁴ Fi ŋmarisika ale chim mi yiili wazuk juijui meena ate mi a goa la.

⁵⁵ Yɔkku mi a teeri fi wari kama, Naawen yaa, m be le ta fi sinsaŋŋa.

⁵⁶ Mi ale kasim a nye diila ale nna. Mi a zuli fi wieŋa kama.

⁵⁷ Fi ka m charuk, Naawen yaa, mi puulim kama ayen m le va fi wieŋa.

⁵⁸ Mi gisi fi nina kama ale m suinum meena, ta ŋmanteka ale mu a ta va chaab ale fi pumpuulimaŋa.

⁵⁹ Mi poli m suitaŋa kama a yaa tagri m chelimu a va fi kaamka.

⁶⁰ M le kpabi m kan beni a zuli fi wieŋa.

⁶¹ Wabaata nyama a bobi mi ale ka miisa, alege m kan baŋ fi sinsaŋŋa.

⁶² Yok suŋsuŋ mi a yiti kama a te fi jiam fi wayɔrisima buusaŋa nyiŋ.

⁶³ Mi ka baai meena ale a chali fu la doa, baai meena ale a va kaamka la doa.

⁶⁴ Tɛŋka meena a sueri ale ka fi ŋmanteka, Naawen yaa, sak mu fi ŋmarisika.

⁶⁵ Nye nalim a te fi tomteerɔwa, a ta va chaab ale fi wanni, Naawen yaa.

⁶⁶ Sak mu yam ale buusi maŋsa, diila mi ta siaka ale ka fi wieŋa.

⁶⁷ Alege ate mi nya ninam la, mi cheŋ a bɛ kama, alege yɔgyɔgla de mi a zuli fi wanni kama.

⁶⁸ Fi nala kama, fi be le a nye diila a nala kama, sak mu fi ŋmarisika.

⁶⁹ Gaasa nyama a pai ka venta a taari mu, alege mi ta fi wieŋa kama ale m suinum meena.

⁷⁰ Ba suiniimaŋa po ba ka ŋmanteka ale jiirimmoa, alege mi mariŋ ka fi sinsaŋŋa.

⁷¹ Ku jam nala kama ate mi tu ninam ate m baga a zamsi fi ŋmarisika.

⁷² Sinsaŋŋa ale nyini fi nɔnni po la ta tuilum a te mi kama a gaam kpana ale ligmɔniŋ tusa.

⁷³ Fi nisima ale nye mi ale tom mu chaab, te mu miŋka ate m zamsi fi wieŋa.

⁷⁴ Baai ale a chali fu la a dan nya mi ba sue a peenti, diila mi pai m yiila a basi ka fi wanni po.

⁷⁵ Mi seba Naawen yaa, ayen fi buusaŋa ka wayɔrisima, fi be namsi mu kama ale wensie.

⁷⁶ Fi ŋmanteka a chim ka m suiyɔgni, a ta va chaab ale fi pumpuulimaŋa ate fi te fi tomteerɔwa la.

⁷⁷ Basi ate fi jiirimu a jam m zuk ate m boro, diila fi sinsaŋŋa ate m mariŋ.

⁷⁸ Gaasa nyama a jo chivie po ba le nye kaasi mu alege daa wari ate m kaasi la, ale m le poli fi wieŋa zuk.

⁷⁹ Baai ale a chali fi la a cheem a jam mi jigi, baai ale a miŋ fi kaamka la.

⁸⁰ Mi a yaali ka m va fi ŋmarisika nalimnyiini, ate m kan jo chivie po.

⁸¹ M jiak kama ale fi varibasika yaalika, alege mi pai m yiila a basi ka fi wanni po.

⁸² Mi ninaŋa yaa jiak kama ale fi pumpuulimaŋa nyaasim, mi a weeni kama ayen, <

⁸³ Mi a nye ase ka daam bunlɔk la a bo nyuisa po, mi kan baŋ fi ŋmarisika.

⁸⁴ Fi tomteerɔwa ale limisi a soa ka sɛ? Ka dimpo ate fi ale namsi baai ale a namsi mu la?

⁸⁵ Gaasa nyama a tu ka gola a magsi mu, ate ku kan va fi sinsaŋŋa.

⁸⁶ Fi wieŋa meena ka ŋaai ate nuru a mariŋ. Maari mu, nuruba ale a namsi mu alege mi an kaasi wari ya.

⁸⁷ Ba tali ka maga ate ba yeeri mi tɛŋka zuk, alege mi an zɛri fi wieŋa.

⁸⁸ Lik m nyuvunni a tara a ta va chaab ale fi ŋmanteka, ate m zuli fi nɔnni po kaamka.

⁸⁹ Fi wanni, Naawen yaa, a kan kpegli, di za kama giŋgiŋ wenŋmazukku po.

⁹⁰ Fi wensieŋa a kasim boro ka dila a cheŋ gaŋsa po meena, fi nye tɛŋka kama, ate ka kasim boro.

⁹¹ Fi buusaŋa a boro kama a jam paari jinla, ŋanta meena a tom a te fu kama.

⁹² Fi sinsaŋŋa dan kan daa ŋaai ate mi a mariŋ, m ti kpi kama m ninammu po.

⁹³ Mi kan baŋ fi wieŋa, ka ŋa lala nyiŋ ate fi lik mi nyuvunni.

⁹⁴ Vari mu a basi, ka fi ale soa mu, mi gisi fi wieŋa.

⁹⁵ Wabaata nyama a limisi kama ayen ba ko mu, alege m le poli fi kaamka zuk.

⁹⁶ Wie meena a ta kpeglimka kama, alege fi wieŋa a boro ka dila.

⁹⁷ Mi ale a yaali fi sinsaŋŋa diila. Mi a poli ŋa zuk ka danni meena.

⁹⁸ Fi wieŋa a basi kama ate m ta yam a gaam m dachaasaŋa, diila ŋa kasim a bo ale mu kama.

⁹⁹ Mi seba ku po ka yega a gaam m sagrɔma meena, diila mi a poli fi kaamka zuk kama.

¹⁰⁰ Mi ta miŋka yegayega kama a gaam nisɔmma, diila mi a zuli fi wieŋa kama.

¹⁰¹ Mi zak naŋsa kama biem suik po meena, ate m baga a zuli fi wanni.

¹⁰² Mi an basi fi buusaŋa, diila fidek ale sak mi.

¹⁰³ Fi wieŋa a masa kama a te mu, a masa a gaam siita m nɔnni po.

¹⁰⁴ Mi nya miŋka kama a nyini fi wieŋa po, dila nyiŋ mi kisi biem suita meena kama.

¹⁰⁵ Fi wanni ka zeuŋ a te m naŋsaŋa, ale bolim a te m suiku.

¹⁰⁶ Mi pɛ kama alege a siak, ayen m le va fi wayɔrisima buusa.

¹⁰⁷ Mi nam ka yega, lik m nyuvunni, Naawen yaa, a magsi ale fi wanni.

¹⁰⁸ Naawen yaa, siak m jiam pimpaukku ale a nyini m nɔi po la, abe fi sak mu fi buusaŋa.

¹⁰⁹ M nyiem pai m nyuvunni a nyo ka m nisima po, m kan baŋ fi sinsaŋŋa.

¹¹⁰ Wabaata nyama a bari ka baruk a magsi mu, alege mi an cheŋ bɛ alege fi wieŋa.

¹¹¹ Fi kaamka ka wie ŋaai ate m tuesi taam wuu, ŋa ka m suinum po masim.

¹¹² Mi suinummu a kasim bo ka fi ŋmarisika taka a ga paari kpeglimka.

¹¹³ Mi kisi popola buye buye nuruba kama, alege mi a yaali fi sinsaŋŋa kama.

¹¹⁴ Fi ka m ligrɔ ale m ja kasim, mi pai m yiila a basi ka fi wanni po.

¹¹⁵ Nama waba nyeerisaŋa nna, ni cheŋ abe ni ge mi, ate mi a baga a ta m Wenni wieŋa.

¹¹⁶ Maari mu a ta va chaab ale fi pumpuulimaŋa, ate m boro, kan basi ate m yiilaŋa a bɛ nna nwuli.

¹¹⁷ Yik mu, ate m nya varibasika, m niŋ ale kasim bo fi ŋmarisika po.

¹¹⁸ Fi a zɛri waai meena ale a basi fi ŋmarisika la kama, diila ba pimpaasimaŋa ka kinla.

¹¹⁹ Tɛŋka zuk wabaata nyama fi a zɛri ba kama ase baai ale kan ta kiri la, dila nyiŋ mi a yaali fi kaamka kama.

¹²⁰ Mi nyiŋ ale a gɔk ate yɔgsum a ta mu, yɔgsum ale ta mu fi buusaŋa nyiŋ.

¹²¹ Mi nye dii ale chim wayɔrisima ale wensie la kama. Dila la, kan basi mu a te baai ale a namsi mu la.

¹²² Seba fi tomteerɔwa nyeboka, kan te gaasa nyama a namsi mu.

¹²³ M ninaŋa a jiak kama, ale mi ale a nya a yaali varibasika la, a nya a yaali fi wayɔrisima pumpuulimaŋa la.

¹²⁴ Nye ale fi tomteerɔwa a ta va chaab ale ŋmanteka, abe fi sak mu fi ŋmarisika.

¹²⁵ Mi ka fi tomteerɔ, te m nya miŋka ate m baga a miŋ fi kaamka.

¹²⁶ Naawen yaa, ku ka diipo ale magsi ayen fi nye wari, fi ale sinsaŋŋa ba kaasi ŋa kama.

¹²⁷ Dii nyiŋla mi a yaali fi wieŋa a gaam ligmɔniŋ kama, a gaam ligmɔniŋ naliŋ,

¹²⁸ ale dii nyiŋla mi a poli ayen fi wieŋa meena a nala kama, mi kisi sui kaasuŋ meena kama.

¹²⁹ Fi kaamka ka wakperikaliisa, dila nyiŋ mi a zuli ŋa kama.

¹³⁰ Fi wieŋa ate fi lagri la a te mu ka bolim, ŋa a te baai ale kan seba wari la miŋka.

¹³¹ Mi lak ka nɔi a vuusi a kpeeri, a yaali fi wieŋa.

¹³² Cheem mi jigi a ta jiirim ale mu, ase fi le kasim a nye dii ale baai ale a yaali fi yuenni la.

¹³³ Basi ate m cheŋ a magsi chaab ale fi wanni, kan te wabiok a nya pagrim m zuwa.

¹³⁴ Vari mu nuruba namsika po a basi, ate mi a zuli fi wieŋa.

¹³⁵ Basi ate fi nina a nyaksi fi tomteerɔwa zuk abe fi sak mu fi ŋmarisika.

¹³⁶ Ninyaata ale nyini m ninaŋa a chali, diila ba kan zuli fi sinsaŋŋa.

¹³⁷ Fi ka wayɔrisima nyɔnɔ, Naawen yaa, fi buusaŋa be ka wamaŋsa.

¹³⁸ Fi kaamka ate fi dueni la ka wayɔrisima, ŋa ka ŋaai ale ta siateka.

¹³⁹ Mi le a yaali diila a basi ate m jiak kama, mi dachaasaŋa a banti fi wieŋa kama.

¹⁴⁰ Fi pumpuulimaŋa m chamsi kama, tomteerɔwa abe a yaali ŋa kama.

¹⁴¹ Ba zɛri mi kama ayen m daa waai ya, m kan baŋ fi wieŋa.

¹⁴² Fi wayɔrisimaŋa a boro ka dila wuu fi sinsaŋŋa be ka wensie.

¹⁴³ Daanika ale sui kaasuŋ ale jam mi zuk, alege fi wieŋa ate mi mariŋ.

¹⁴⁴ Fi kaamka ka wayɔrisima a cheŋ wuu, te mu miŋka ate m baga a boro.

¹⁴⁵ Mi a wi ale ka m suinum meena, tulisi mu, Naawen yaa, ate m va fi ŋmarisika.

¹⁴⁶ Mi kaari a wi fu kama, vari mu ate m ta fi kaamka.

¹⁴⁷ Mi a yiti ka saluik yokyokwa a wi a yaali maarika, mi pai m yiila a basi ka fi wanni po.

¹⁴⁸ Mi ninaŋa lak a nya yokku ka dila ayen m baga a poli pumpuulimaŋa zuk.

¹⁴⁹ Wom m lueluk a ta va chaab ale fi ŋmanteka, lik m nyuvunni, Naawen yaa, a ta va chaab ale fi buusaŋa.

¹⁵⁰ Baai ale a zɔk gaasa zɔga la a moata kama, alege ba yalima kama ale fi sinsaŋŋa.

¹⁵¹ Alege fi a moata kama, Naawen yaa, fi wieŋa meena ka wensie.

¹⁵² Dipowa mi zamsi nyini ka fi kaamka po ate fi basi ŋa ayen ŋa boro taam wuu la.

¹⁵³ Nya m ninammu a vari mu a basi, ale mi an baŋ fi sinsaŋŋa wari ya.

¹⁵⁴ Biisi te mu a vari mu a basi, lik m nyuvunni a ta va chaab ale fi pumpuulimaŋa.

¹⁵⁵ Varibasika a yalima kama ale wabaata nyama, diila ba kan gisi fi ŋmarisika.

¹⁵⁶ Fi jiirimu a zuak kama, Naawen yaa, lik m nyuvunni a ta va chaab ale fi buusaŋa.

¹⁵⁷ Dachaasaŋa ale a namsi mu la a piisi kama, alege mi an basi fi kaamka.

¹⁵⁸ Mi a nya baai ale kan ta siaka la ale ka kisika, diila ba kan zuli fi wanni.

¹⁵⁹ Nya mi ale a yaali fi wieŋa diila, lik m nyuvunni, Naawen yaa, a ta va chaab ale fi ŋmanteka.

¹⁶⁰ Fi wieŋa meena ka wensie, fi wayɔrisima buusaŋa meena a kan kpeglim.

¹⁶¹ Kpaŋŋa ale a namsi mu alege mi an kaasi wari ya, alege m suinum a gɔk kama fi wanni nyiŋ.

¹⁶² Mi sui a peenti kama fi puulimka nyiŋ ase waai ale tuilum ŋanta la.

¹⁶³ Mi kisi venta kama alege a yaali fi sinsaŋŋa.

¹⁶⁴ Dai yeŋ po mi a pak fu ka naŋtuok nɔi buyopɔi fi wayɔrisima buusaŋa nyiŋ.

¹⁶⁵ Baai ale a yaali fi sinsaŋŋa la a ta ka suiyɔgni kpienni, jaab abe karo a basi ate ba a nak naŋŋa.

¹⁶⁶ Mi a limisi fi varibasika kama, Naawen yaa, ale a va fi wieŋa.

¹⁶⁷ Mi a zuli fi kaamka kama, diila mi a yaali ŋa kama nna yegayega.

¹⁶⁸ Mi a zuli fi wieŋa ale fi kaamka kama, diila mi suitaŋa meena fi seba kama.

¹⁶⁹ Basi ate m kumsaŋa a paari fu, Naawen yaa, te mu miŋka a ta va chaab ale fi wanni.

¹⁷⁰ Basi ate m puusaŋa a jam fi jigi, vari mu a basi a ta va chaab ale fi puulimka.

¹⁷¹ Basi ate pimpauk a nyini m nɔi po a nyini, diila fi a sak mu fi ŋmarisika kama.

¹⁷² Basi ate m nɔnni a pai fi wanni a yi yiila, diila fi wieŋa meena ka wayɔrisima.

¹⁷³ Basi ate fi nisa a gomsi m maarika, diila mi lueri ka fi wieŋa.

¹⁷⁴ Mi a yaali fi varibasika kama, Naawen yaa, m be mariŋ fi sinsaŋŋa kama.

¹⁷⁵ Basi ate m boro ate mi a pak fu, abe fi buusaŋa a maari mu.

¹⁷⁶ Mi cheŋ a bɛ kama ase posuk ale cheŋ a bɛ la. Gisi fi tomteerɔwa, diila mi an baŋ fi wieŋa.