Yiila 118 - WEN GBAŊKA

¹ Pa jiam a te Naawen, diila wa nala kama, wa ŋmanteka a boro ka dila wuu.

² Basi ate Izirali a weeni ayen, <>

³ Basi ate Aaron yenni demma a weeni ayen, <>

⁴ Basi ate baai ale a chali Naawen la a weeni ayen, <>

⁵ Mi daanika po mi kaari kama a wi Naawen, ate wa tulisi mu a vari mu a basi.

⁶ Naawen a bo le mu kama, m kan chali yɔgsummoa. Ka boa ate nurubiik a baga a nye mi?

⁷ Naawen a bo le mu kama, wa ka m maarɔ. Mi ale nya m dachaasaŋa ale ka nakdeka.

⁸ Fi dan suk fidek Naawen jigi a zunchoŋ fi le ta sebchakka ale nurubiik kama.

⁹ Fi dan suk fidek Naawen jigi a zunchoŋ fi le ta sebchakka ale nabisa kama.

¹⁰ Tɛŋsaŋa meena a gilim mi kama, alege Naawen yuenni nyiŋ gebi ba basi.

¹¹ Ba gilim mi kama jigi meena, alege Naawen yuenni nyiŋ gebi ba basi.

¹² Ba nye ka kukuluk a gilim mi ase see la, alege ba kpi nna nwuli ase munsa ba ju la, Naawen yuenni nyiŋ gebi ba basi.

¹³ Ba tusi mi a ta ga ŋaaŋ ate mi boro ayen m lo, alege Naawen a maari mi.

¹⁴ Naawen ka m pagrim ale m yiili, wa chim ka m varibasika.

¹⁵ Suipeentik ale nakdeka ale a nuem wayɔrisima nyama viitaŋa po, <>

¹⁶ Naawen juga nisaŋa a zak ka ŋmai. Naawen juga nisaŋa a tom ka wa kpiema.

¹⁷ M kan kpi alege m le boro kama, a mooli Naawen ale nye diila.

¹⁸ Naawen a namsi mi kama chekki, alege wa an pai mu a te kummoa.

¹⁹ Lagri wayɔrisima tuoku a te mu, m le jo a pai jiam a te Naawen.

²⁰ Naawen tuoku ale nna kuui ate wayɔrisima nyama a va a jo la.

²¹ M le te jiam, diila fi tulisi mu kama, fi chim ka m varibasika.

²² Tintain dii ate seerɔma a zɛri la dila ale chim nyubini gugoruku tintain,

²³ ka Naawen ale nye kude, ku be ka wakperikaliik ti nina po.

²⁴ Dai dii dai ate Naawen a nye la ale nna, ni basi ate ti a naŋ abe ti sue a peenti.

²⁵ Naawen yaa, vari ti a basi, Naawen yaa, basi ate ti nya tidek.

²⁶ Niaka a bo waai ale cheena Naawen yuenni nyiŋ la. Ti a niak fu a nyini Naawen yenni po. (Matiu 21:9)

²⁷ Naawen ka Wen, wa be le basi ate wa bolimu a nyaksi ti zuk. Tiisa vaata ale bo nisa po la, gum baai ale tom chaab la po a ga paari kuŋkuŋku nyiilaŋa.

²⁸ Fi ka m Wen, m le pai jiam a te fu, fi ka m Wen, m le zak fi yuenni a zaani.

²⁹ Pai jiam a te Naawen, diila wa nala kama, wa ŋmanteka a boro ka dila wuu.