Yiila 115 - WEN GBAŊKA1 Daa tama, Naawen yaa, daa tama alege fi yuenni a nya zula, fi ŋmanteka ale fi wensieŋa nyiŋ. 2 Ka boa ate tɛŋsaŋa a weeni ayen, < 3 Tama Wenni a bo ka wenŋmazuk, wa a nye ka dii ale a peenti wa sui la. 4 Alege ba bɔgtaŋa ka kpana ale ligmɔniŋ, ate nuruba a nye ale ba nisima. 5 Ba ta nɔi alege an baga a biisi, nina alege an baga a nya, 6 ba ta tue, alege an baga a wom, nyue alege an baga a wom nyum, 7 ba ta nisa, alege an baga a tiri jaaboa, naŋsa, alege an baga a cheŋ, yaase ba nye wai ale ba tutɔgtaŋa. 8 Baai ale a nye ti la ale nye ase ka bɔgtaŋa la, ale baai meena ale ta sebchakka ale ti la. 9 Izirali yeri yaa, ni ta sebchakka ale Naawen. Wa ale ba maarɔ ale ba ligrɔ. 10 Aaron yeri yaa, ni ta sebchakka ale Naawen. Wa ale ba maarɔ ale ba ligrɔ. 11 Nama baai ale a chali wa la, ni ta sebchakka ale Naawen, wa ale ba maarɔ ale ba ligrɔ. 12 Naawen ale teeri ti abe wa niak ti. Wa le niak Izirali yenni, wa le niak Aaron yenni. 13 Wa le niak baai ale a chali Naawen la, nuru fiisa ale nuru kpienta. 14 Naawen a basi ate ni piisi, nama ale ni bisaŋa meena. 15 Naawen, wenzuk ale tɛŋ meena Nyeerɔwa a niak ni. 16 Wenŋmazuk niŋniŋŋa ka Naawen ale soa, alege tɛŋka wa pai te ka nurubiik. 17 Daa kpieba ale a pak Naawen, baai ale a siŋ nna diki la. 18 Ka tama ŋan vuutaŋa ale a zak Naawen a zaani, yɔgyɔgla de ale daaŋa meena. Pak Naawen. |
© 2023, Ghana Institute of Linguistics, Literacy and Bible Translation