Yiila 109 - WEN GBAŊKA

¹ Wen yaa, fi waai ate mi a pak la, kan nye diki,

² diila wabaata ale pimpaasima nyam ale lak ba noa a ta chaab ale mu. Ba lak ka ba noa a biisi a velim a ta chaab ale mu.

³ Ba gilim mi kama ale kisika wie, a siti mu alege daa wari ate m nye.

⁴ Ba pai ka velimteka a tuni mi yaalika, alege mi ka puusa nuru.

⁵ Ba pai ka biem a tuni mi nalimu, ale pai kisika a tuni mi yaalika.

⁶ Lueri nuru biok ate wa ta chaab ale wa, abe waai ale a weeni ayen wa kaasi la a za wa juga.

⁷ Ba dan bek wa, basi ate wa siak wa kaasuŋku, abe wa puusa a nye ale wadek.

⁸ Wa daaŋa a kan soa diiya, nuru yoŋ a tuesi wa kpaŋtaŋa jigini.

⁹ Wa bisaŋa a chim kpiŋsa abe wa powa a chim pukɔgi.

¹⁰ Wa bisaŋa a chim baai ale nyiem a juisi, abe ba yiak ba ate ba nyini ba yie luemaŋa po a nyini.

¹¹ Waai ale pai ŋanta peem te wa a tuesi ŋan baai meena wa ta la, abe nicham a vari wa le nam nya ŋan baai la.

¹² Waai a kan te ŋmanteka a paari wa yaase wa sak jiirim ale wa bi kpiŋsaŋa.

¹³ Wa ŋaaŋsaŋa ba gebi a basi, ba yueŋa kan maa bo baai ate ba za ba biak la po.

¹⁴ Naawen a teeri wa koma wabaataŋa, wa mawa wabaataŋa kan maa duisi basi.

¹⁵ Ba wabaataŋa kasim bo Naawen niŋ, ate wa gebi ba wari tɛŋka zuk basi ate waai kan teeri ba wari ya.

¹⁶ Diila wa an maara a poli ŋmanteka, alege a vi ko ŋanjaksaŋa ale baai ale a silim ŋanta ale baai sue ale kaasi.

¹⁷ Wa a yaali ka kikaasa kaka ku jam wa zuk, wa kan yaali niaka te ka, niaka abe yalima ale wa.

¹⁸ Wa jo ka kikaasa ase garuk la, ate ku jo wa nyiŋka ase nyiam la, a jo wa kobaŋa ase kpaam la.

¹⁹ Ku nye ase garuk ale vili wa la, ase chiak gbain ale bobi wa chiak taam wuu la.

²⁰ Kude chim Naawen tutuna a te baai ale a weeni mi kaasi la, tutuna a te baai ale biisi biem a te mi la.

²¹ Alege fi Nyɔnɔwa waai ale ka Naawen yaa, nye mu magsi fi yuenni nyiŋ, fi ŋmanteka nalimu po vari mu a basi.

²² Mi jaŋ kama ale a silim, ate m suinummu po ku a nye ase m kɔni la.

²³ Mi muriŋ a bɛ ase ka junɔi yisuŋ la, a kpaanti mi a basi ase tintue la.

²⁴ Mi duna a gbariŋ kama ŋandiinta silim nyiŋ. Mi buk kama a tali koba nyiini.

²⁵ Mi yaa chim ka ja laam a te baai ale a weeni ayen m nye a kaasi la, ba dan nya mu, ba a yuk ka ba zuima.

²⁶ Naawen, mi Wen yaa, maari mu. Vari mu a basi a ta va fi ŋmanteka.

²⁷ Basi ate ba seba ayen ka fi nisa, Naawen yaa, ate fi pai nye ku.

²⁸ Dai dii dai ba le ka, alege fi le niak, ba dan siti ba le pai ba a nyo chivie po, alege fi tomteerɔwa ale naŋ.

²⁹ Baai ale a weeni ayen mi kaasi la ale jo chivie po, abe chivie a vili ba ase garuk la.

³⁰ Mi pai m nɔnni a zak Naawen yegayega, nuru boanni po m le pak wa.

³¹ Diila wa za ka waai ale a silim la juga geŋ, ayen wa vari wa baai ale a bo wa kum buusa la jigi a basi.