Yiila 107 - WEN GBAŊKA

¹ Pai jiam a te Naawen diila wa nala kama, wa ŋmanteka a boro ka dila cheŋ.

² Baai ate Naawen a da tuesi ba basi la a weeni nna, baai ate wa da tuesi dachiaka nisa po la,

³ baai ate wa tigsi a nyini tɛŋsaŋa po la, a nyini kori ale yeniŋ, a nyini wiiluk ale yeseok.

⁴ Ba gela a cheŋ bɛ kama gɔnni po juijui ate nuruba a karo la, ba kan nya suik a cheŋ tɛŋ po ate ba baga a kali.

⁵ Kom ale nyanyuila ale jam ta ba, ate ba a jɔk ba nyuvooŋa.

⁶ Ate ba yaa kum wi Naawen ba daanika po, ate wa yeeri ba ta nyini daanika po.

⁷ Wa ta ba va suik yɔrisuŋ a cheŋ tɛŋ po juijui ate ba baga a kali.

⁸ Basi ate ba pai jiam a te Naawen wa ŋmanteka ale wa wakperikaliisaŋa ate wa nye a te nuruba la.

⁹ Wa basi ate nyanyuila ale ta baai la a chak ate kɔm ale ta baai mɛ la a chak ale ŋan maŋsa.

¹⁰ Ba gela a kali legi po ale legi nna kpitɔ po, ate ligrɔba a nam ale kuta chɔrima,

¹¹ diila ba zɛri kama ale ta chaab ale Wen ale weeni diila ale zɛri Wen Dii Ale Bo Wenŋmazuk La sinsaŋŋa.

¹² Wa yaa basi ate ba siak te ninam tuak, ba a nak naŋsa alege waai karo a maari ba.

¹³ Ate ba kaari a wi Naawen ba daanika po, ate wa yeeri ba ba daanika po.

¹⁴ Wa ta ba nyini legi po a nyini legi nna kpitɔ po a nyini ale gebi ba chɔrimaŋa.

¹⁵ Basi ate ba pai jiam a te Naawen wa ŋmanteka nyiŋ ale wa wakinkaglaŋa ate wa tom a te nuruba la,

¹⁶ diila wa wɛ ka kutuk mɔnuŋ nansuiŋta alege wɛ kutuk biga a jo.

¹⁷ Ba gela a ta tukpari nyeka suita a chim betta, a nam ale nyiŋtuila ba wabaataŋa nyiŋ.

¹⁸ Ba kisi ŋandiinta meena kama ale torisi moata kum nansuiŋtaŋa.

¹⁹ Ate ba yaa kum wi Naawen ba daanika po, ate wa vari ba ba daanika po a basi.

²⁰ Wa tom wa wanni a tebi ba, wa vari ba vɔrumu po a basi.

²¹ Basi ate ba pai jiam a te Naawen wa ŋmanteka nyiŋ ale wa wakinkaglaŋa ate wa tom a te nuruba la.

²² Basi ate ba nye jiam kaabka tiirim a weeni wa tuimaŋa wari ale suipeentik yiila.

²³ Ba gela a nyini cheŋ nyakpiemu po kama ale ŋaaruŋta, ba jam ka geruŋdɔba nyakpientaŋa po.

²⁴ Ba nya Naawen tuimaŋa kama, wa wakinkaglaŋa liuŋku po.

²⁵ Wa biisi kama a siti va pagrika ate ku zak nya miisaŋa wen.

²⁶ Ti yiti kama a tigsi jueli wenŋmazuk a ŋman siŋ tɛŋ, ba kaasuŋku po ba nyiŋbiini a deri bɛ.

²⁷ Ba jam a ja kama ase dabugrɔba la, ate ba sebika meena jam chim kinla.

²⁸ Ate ba kum a wi Naawen ba daanika po ate wa ta ba nyini daanika po nyini.

²⁹ Wa te ate va pagrika a yɔk ate nya miisaŋa a nye diki.

³⁰ Ba sue jam peenti kama ku le yɔk la, ate wa ta ba jam juijui dek ate ba a yaali la.

³¹ Basi ate ba pai jiam a te Naawen wa ŋmanteka nyiŋ ale wa wakinkaglaŋa ate wa nye a te nuruba la.

³² Basi ate ba zak wa yuenni zaani nuruma suŋsuŋ abe ba pak wa nisɔmma tigsuŋku po.

³³ Naawen a basi ate bela a kpeeri meena ale basi ate beli naŋsa nyiam a kan chali.

³⁴ Wa basi ate tɛŋ sii ale nala la a tagri chim sii ale ta yesa a dua kinla, baai ale bo dula la wabaataŋa nyiŋ.

³⁵ Wa tagri tintain busuŋ tɛŋsa ate si ta bulisa ale nyiam tɛŋ kosisa ate si ta beli naŋsa ate ŋa nyiam a chali.

³⁶ Wa basi ate kɔm nuruba a kali dula, a sɛ tɛŋ ayen ba boro.

³⁷ Ba bori laŋsaŋa po ale vuk tiisa kaduksaŋa po a tigsi ŋanta nna yegayega.

³⁸ Wa niak wa nuruma, ate ba nya bisa nna yegayega, a lik ba niiŋa ta ate ŋa kan muuri.

³⁹ Ate badek ale soa diila a muuri, ate namsika ale kaasuŋ ale suipuurum a basi ate ba yik badek.

⁴⁰ Waai ale ka a yaali nuru kpienta wie la a basi kama ate ba a nyiem juijui ale kan ta suik la.

⁴¹ Alege wa yeeri ŋanjaksaŋa ba ninam po ale basi ate ba dɔkdemma a piisi ase piisa la.

⁴² Ate nuru maŋsaŋa nya a naŋ, alege nuru baataŋa a mum ba noaŋa.

⁴³ Nuru waai ale ta yam la, wa be wom wieŋa de abe wa poli Naawen ŋmanteka.