Yiila 105 - WEN GBAŊKA

¹ Te Naawen jiam, a wi wa yuenni basi ate tɛŋsaŋa a seba wa ale nye diila.

² Leni yiila a te wa, leni pimpauk yiila a te wa, weeni wa wakinkagla nyeelaŋa meena te wa.

³ Ta suipeentik wa tuilum yuenni nyiŋ, basi ate baai suiniima ale a gisi Naawen la a ta mariŋka.

⁴ Zak nya Naawen ale wa pagrimu, kasim a gisi wa nimbidiaka diipo meena.

⁵ Ni teeri wakperikaliisaŋa ate wa nye la wie, wa wakinkaglaŋa ale wa buusaŋa ate wa weeni la.

⁶ Izirali wa tomteerɔwa ŋaaŋbisa, Jekob waai ate wa lueri la nidoabilisa.

⁷ Wa ka Naawen tama Wen, wa buusaŋa a bo tɛŋzuk de meena kama.

⁸ Wa a teeri wa nɔiyeŋka kama taam wuu, wanni ate wa weeni a te gaŋsa tusa la,

⁹ nɔiyeŋka ate wa jam nye ale Abrayam la, pumpuulimaŋa ate wa jam puulim ale Aizik la.

¹⁰ Wa jam ŋman biisi di wari kama ale Jekob ase sinsaga la, ayen wa weeni Izirali demma ase ka nɔiyeŋ kaai ale ka boro a beni.

¹¹ <>

¹² Ba ale jam kan soa diila, an sum soa diila, ale chim nicham ka po la.

¹³ Ba jam bo ka tɛŋsaŋa po a tuinti, a nyini naam po a taam m bu po.

¹⁴ Wa an jam basi ate nuru a daani ba, ba nyiŋ wa toariŋ nalima.

¹⁵ Wa weeni ayen, <>

¹⁶ Wa wi kɔm ate bu siŋ tɛŋka zuk ale kaasi ŋandiin tii ate ba te ba la.

¹⁷ Ate wa tom nuru ate wa dɛ ba niŋ, Josefi waai ate ba pai da ase yɔma la.

¹⁸ Ba muli wa naŋsa ale chɔrima, a pai wa ŋinni a su kuta po.

¹⁹ Ate wa le jam weeni diila a jam nye, ate Naawen wanni a yaa jam sak ayen wa ta wensie.

²⁰ Naawa a tom a yeeri wa, nuruma kpagni a lak wa basi.

²¹ Wa basi ate wa chim wa yenni kpagi, a nya wa ŋan baai meena ate wa soa la.

²² Ayen wa a sak nabisaŋa wa le mariŋ diila abe wa a sak wa nisɔmma yam.

²³ Izirali yaa jo Ejipiti, Jekob a jam bo Yɛm tɛŋka ase ka nichaanɔ la.

²⁴ Naawen a basi ate wa nuruma a biak. Wa basi ate ba piisi nna yegayega a te ba dachaasaŋa.

²⁵ Baai suiniima ate wa tulim ate ba kisi wa nuruma, ayen ba zɔk a ta chaab ale wa tomteerɔwa.

²⁶ Wa tom Moosis wa tomteerɔwa ale Aaron, waai ate wa lueri la.

²⁷ Ba tom wakperikaliisa ba suŋsuŋ, wakinkagla Yɛm tɛŋka po.

²⁸ Wa tom legi a basi ate tɛŋka a sobi diila ba an jam zɛri wa wieŋa?

²⁹ Wa tulim ba nyaataŋa ate ti chim ziim, a basi ate ba jumaŋa a kpi.

³⁰ Ba tɛŋka a sueri ale buntua, ŋaai ale jo ba kpaŋŋa diin goamaŋa po.

³¹ Wa biisi, ate nanjuŋsa nna vuun a jam, ate bumbuma a sueri ba tɛŋka meena.

³² Wa tulim ba ŋmorukku ate ku chim ŋmoruk tana, ale nyaksika tɛŋka meena.

³³ Wa kaasi ba yɔnaŋa tiisaŋa ale kinkaŋsaŋa, a wɛ ba tɛŋka tiisaŋa.

³⁴ Wa biisi ate tintue jam, nanchoŋta a ka chiina.

³⁵ Ba dɛ ŋanta ale ta vaata la meena ba tɛŋka po, a dɛ ba tɛŋka ŋanta meena.

³⁶ Ate wa ko bi kpaŋŋa meena ba tɛŋka po, ba nidoama ale piilim biak baai la.

³⁷ Wa ta Izirali nyini, a ji ba ale kpana ale ligmɔniŋ, ba diinaŋa po waai an nye beya.

³⁸ Ejipiti demma sue jam peenti kama ba le basi dula la, dii nyiŋla Izirali yɔgsum ale jam lo ba zuk.

³⁹ Wa basi ate ka chiŋmari a teeri lik ba, ale bolim ayen bu a nya yok.

⁴⁰ Ba bek, ate wa ta yeŋsa jam te ba, a basi ate ba dɛ wenzuk ŋandiinta a chak.

⁴¹ Wa lak piuŋku ate nyiam a na nyini, ase beli la bu chali kama gɔnni po.

⁴² Diila wa teeri ka wa tuilum pumpuulimaŋa ate wa te wa tomteerɔwa Abrayam la.

⁴³ Wa ta wa nuruma a nyini ale ka suipeentik, baai ate wa lueri la ale suipeentik nuemka.

⁴⁴ Wa pai satɛŋsaŋa tɛŋsa a te ba ate ba tuesi ŋan baai ate nuru yonta a nam nya la,

⁴⁵ ate ba baga a ta wa wieŋa abe ba a kpesi wa sinsaŋŋa. Pak Naawen.