Yiila 104 - WEN GBAŊKA

¹ M chiiga, pak Naawen. Naawen yaa, mi Wenni. Fi zuak ka nna yegayega. Fi pai ka nalim ale zula a lik fidek ase garuk la.

² Wa pobi ka wadek ale bolim ase garuk la, wa dari wenŋmazukku ase gbain la.

³ Wa dueni wa kiani chibsaŋa nyaataŋa zuk. Wa basi ate chiŋmaaŋa a chim wa toroko ale do vioku kiŋkaŋŋa.

⁴ Wa basi ate vaata a chim wa tintomdɔba, bolim ŋaasa a chim wa tomteerɔba.

⁵ Wa basi ate tɛŋka a za ka nyuba zuk, ka kan choa.

⁶ Fi pai nyaata a lik ka ase garuk la, nyaataŋa a za a gaam guutaŋa.

⁷ Alege fi le toariŋ la nyaata a chali, fi le na la ti yiri ga zi,

⁸ ti chali va guutaŋa zuima, ti chali siŋ vaasaŋa po, juijui ate fi dak ayen ti cheŋ la.

⁹ Fi dueni ka bain ate ti an baga a gaamu, ti kan ŋman lik tɛŋka diipo diipo.

¹⁰ Wa basi ate nyiam a nyini bulisaŋa po a siŋ vooliŋsaŋa po, a chali a va guutaŋa suŋsuŋ.

¹¹ A te tɛŋka gɔi duŋsaŋa meena nyiam, bon waarisaŋa meena a kɔ si nyanyuila kɔm.

¹² Wenzuk nuinsa a yɔk si tugta nyaataŋa nɔi, a yi yiila tiisaŋa naŋsaŋa po.

¹³ Wa a zaŋti guutaŋa a nyini kiani po, tɛŋka a chak ale wa nisa tuima nyuentaŋa kama.

¹⁴ Wa basi ate wuuk a nyini ate niiŋa a dɛ ale pa ŋanborinta a te nurubiik ate wa kpa ate ŋandiinta a jam.

¹⁵ Tɛŋ kala mɛ zuk ate nurubiik a nya daam a nyu a naŋ, a nya kpaam a sa wa nina ate ŋa a nyaksi, a nya ŋandiinta a dɛ a nya nyiŋ pagra.

¹⁶ Naawen tiisaŋa a nya zaŋti ka kama nalimnyiini, Lebanon nyunyoŋta ate wa vuk la.

¹⁷ Dula ate nuinsaŋa a yɔk si tugtaŋa, jumbaliiruku ta ku yenni ka ti sii ale nye nna turɔ la po.

¹⁸ Guwoŋtaŋa ka gɔi bua ale soa, pinaŋa ka suensa sukka jigi.

¹⁹ Chiika ale a sak yoei ale wenkarik, wenbinni a seba diipo ate di a siŋ la kama.

²⁰ Fi le ta legi a jam, ate di a chim yok, ate tiisaŋa po duŋsa meena a nyiem dikdik.

²¹ Gbeŋmaŋa a wuuri a yaali ŋanta ŋa yik, ŋa a gisi ŋa ŋandiinta Wen jigi.

²² Wenbinni a pusi, ate ŋa zu cheŋ, ŋa ŋmani ga duak ŋa goomu jigini.

²³ Ate nurubiik a yaa nyini cheŋ wa tuima jigi, wa bo ka wa tomka jigini a ga paari junɔi.

²⁴ Fi tuimaŋa a soa ka sɛ, Naawen yaa, Fi nye ba meena ale ka yam, tɛŋka a sueri ale ka ŋan baai ate fi nye la.

²⁵ Nyakpiemu ale la a dua, a labsa nna jabababa, ate fi le nye ŋan baai la a boro a ka chiina, ŋanvu tii ale ka ŋan kpeenta ale ŋan fiisa.

²⁶ Dula ate ŋaaruŋtaŋa a cheŋ niŋ ale ŋaaŋ, ate duŋ kperikaliika ate fi nye la a nyiem dula.

²⁷ Bade meena a nya ka fi ayen fi te ba ŋandiinta diipo ale magsi la.

²⁸ Fi dan te ba, ba tigsi. Fi dan lak fi nisaŋa, ba a chak kama ale ŋanmaŋsa.

²⁹ Fi dan suk fi nimbidiaka ku a daani ba kama, fi dan yeeri ba vuusumu ba a kpi kama a ŋmani a cheŋ tantaŋa po.

³⁰ Fi le tom fi Chiika la, wa nye ba kama, alege a basi ate tɛŋka a ŋman chim tɛŋ paalik.

³¹ Naawen zulaŋa abe boro taam wuu, Naawen abe a naŋ wa tuimaŋa nyiŋ.

³² Wa waai ale a nya tɛŋka ate ka a choa, waai ale a tiri guutaŋa ate ti a nyini nyuisa.

³³ Mi le yi yiila a te Naawen m boka po meena, mi ale tɔlim vua la, m le yi yiila a pak m Wenni.

³⁴ Mi ale a poli diila abe peenti wa sui, ase mi ale a naŋ Naawen niŋ la.

³⁵ Alege wabaata nyam abe muriŋ bɛ tɛŋka zuk, ate gaasa nyama kan ŋman boro. M chiiga, pak Naawen. Pak Naawen.